శశికళ/కళా పరిమళము
కళా పరిమళము
నేను : నన్నెటే ప్రేమింతు ఓరాణి
నన్నెటే పాలింతు ఓ దేవీ !
ఆమె : నిన్నెరా ప్రేమింతు
వెన్నెలల బాలరా
నేను : నీ అంద మెక్కడే
నా అంద మెక్కడే
దివ్యపధములనుండి దిగివచ్చు మూర్తి వే
భూమిపై తిరిగేటి పోటు మానిసినేను !
ఆమె : భూమి నందముసేయు పుణ్యమూర్తివి నీవు
ఆకాశ యాత్రలో అంతు దొరకని నేను
నీహృదయ మందముర
నీసొగసు నీవెరా !
నేను : అర్ధచంద్రుడు నుదురు అమృతరసమే పెదవి
ఆకాశగంగ నీ అంగ విన్యాసాలు
నీవు సొబగుల రాణివే దేవి
నేను కర్కశ మూర్తినే చెలీ !
ఆమె : నీవదన ముషసురా నీచూపు కాంతిరా
నీపెదవిలో పాట నృత్యాలు సలుపురా
అందమే నీదిరా
సుందరిని నేనురా !
నేను : నీమూర్తి పూజింప
ఈ మనుజు లెందరో
అందరిలొ ఒఖ్ఖణ్ణి
ఆశ నాకేలనే !
ఆమె : బ్రతుకు సర్వస్వమ్ము
పరమ నైవేద్యమౌ
నీపూజె పూజెరా
నీవు నేనేనురా
నీకు నేనై వెలసి
నాకు నీవై పొలసి
ఇరువురము బ్రతుకులో
కెరలింతు మందదాలు !
నేను : ఇరువురము లోకాన
ఆమె : పరిమళింతుము కళల
ఇరువురము ప్రేమికుల
మిరువురము శిల్పులము.