రేకు:0278-01 సామంతం సం: 03-447 దశావతారములు
పల్లవి : |
సంసారమే మేలు సకలజనులకును
కంసాంతకుని భక్తి గలిగితే మేలు
|
|
చ. 1: |
వినయపు మాటల విద్య సాధించితే మేలు
తనిసి యప్పులలోన దాఁగకుంటే మేలు
మునుపనే భూమి దన్ను మోచి దించకుంటే మేలు
వెనుకొన్న కోపము విడిచితే మేలు
|
|
చ. 2: |
కోరి వొకరి నడిగి కొంచపడకుంటే మేలు
సారె సారె జీవులను చంపకుంటే మేలు
భారపుటీడుమలను పడకుండితే మేలు
కారించి తిట్ల కొడిగట్టకుంటే మేలు
|
|
చ. 3: |
పరకాంతల భంగపరచకుంటే మేలు
దొరకొని కెళవులు దొక్కకుంటే మేలు
అరుదైన శ్రీవేంకటాద్రివిభునిఁ గొల్చి
యిరవై నిశ్చింతుఁడైతే నిన్నిటాను మేలు
|
|
రేకు: 0278-02 లలిత సం: 03-448 విష్ణు కీర్తనం
పల్లవి : |
భగవద్విభవపు ప్రత్యక్షం బిది
జిగి నిందొకటియుఁ జేయఁగఁ గలమా
|
|
చ. 1: |
దైవికమేపో తతియగు వానలు
తావగు మొలకలు దైవికమే
కావిరినివెల్లాఁ గంటా వింటా
దైవమునేలో తలఁచము మనము
|
|
చ. 2: |
జననమరణములు హరి దైవికమే
తనుపోషణములు దైవికమే
నసి యివెల్లా నెఱిఁగియు మరిగియు
కొన దైవమునేలో కొలువము మనము
|
|
చ. 3: |
యిహపరంబులును యివి దైవికమే
తహతహ లుడుపఁగ దైవికమే
అహిపతి శ్రీవేంకటాధిపు కృపచే
మహిమ గంటిమిఁక మఱవము మనము
|
|
రేకు: 0278-03 బౌళి సం: 03-449 వైష్ణవ భక్తి
పల్లవి : |
{{Telugu poem|type=చ. 1:|lines=<poem>
|
|
పల్లవి : |
నన్నెంచఁ బనిలేదు నిన్నెంచుటే కాని
మన్నించు హరి నీ మఱఁగు చొచ్చితిని
|
|
చ. 1: |
రాజుఁ బెండ్లాడిన యట్టి రమణి యేజాతైనా
పూజితమై యిన్నిటాను భోగించినట్టు
సాజాన నే నెంత సకలహీనుఁడనైనా
వోజతో నిన్నుఁ గొలిచి వున్నతుఁడనైతిని
|
|
చ.2: |
వేల ముద్దుటంగరము వేడుకనిడి ప్రధాని
కేలెత్తి యిందరిచే మొక్కించుకొన్నట్టు
నేలనే నీ ముద్ర మోచి నే నేఁటివాఁడనైనా
పేలరి జగములోనఁ బెద్దనైతి నిదివో
|
|
చ. 3: |
తల్లిదండ్రి గలవాఁడు తప్పులేమైనాఁ జేసి
తల్లితో ముద్దుగునిసి తప్పించినట్టు
చల్లని శ్రీవేంకటేశ సరవి నీ కృపవల్ల
కెల్లున నిన్ను నుతించి గెలిచితి నిదివో
|
|
రేకు: 0278-04 శుద్ధవసంతం సం: 03-450 వైష్ణవ భక్తి
పల్లవి : |
ఎందు వెదకనేల యే ప్రయాసాలు నేల
యిందే వున్నది బ్రదు కిహపరములకు
|
|
చ. 1: |
ముక్కోటి తీర్థములు ముకుందుదాసుల-
వొక్కపాదాంగుటమున నొలికీనిదే
మిక్కిలి జపతపాలు మించిన ప్రపన్నుల-
చిక్కని కృపాకటాక్షసీమ నున్నదిదివో
|
|
చ. 2: |
చేసేటి పుణ్యఫలాలు శ్రీవైష్ణవులచేత
రాసులై యిరుదెసల రాలీనివే
ఆసల విజ్ఞానార్థ మదివో ప్రపన్నుల-
భాసురపుఁ బెదవులఁ బాఁతి పైపై నున్నది
|
|
చ. 3: |
సకలదేవతలచే సాధించే వరములు
మొకరి తదియ్యులమూఁక నిదివో
వెకలి శ్రీవేంకటాద్రివిభుని మహిమలెల్లా
ప్రకటించి వీరి సల్లాపాన నున్నదిదివో
|
|
రేకు: 0278-05 సాళంగం సం: 03-451 శరణాగతి
పల్లవి : |
నీకుఁ దొల్లే యలవాటు నిరుహేతుకపుదయ
జోక నురుత మెచ్చిన సులభఁడవేకా
|
|
చ. 1: |
నేరములు దొలఁగించ నెలవులు గలిగించ
గారవించ హరి నీవే కలవు నాకు
నా పేరఁ బిలిచితే నారాయణ యనెనంటా
చేరి కాచినటువంటి శ్రీపతివిగా
|
|
చ. 2: |
దురితము లణఁగించ దుఃఖములు పెడఁబాప
గరిమఁ గేశవ నీవే కలవు నాకు
మరమరా యంటేను మరి రామ యనెనంటా
తిరముగఁ గాచి నట్టి దేవుఁడవుగా
|
|
చ. 3: |
వినుతులు చేకొని వేడుకతో నన్నుఁ గావ
ఘనుఁడ శ్రీవేంకటేశ కలవు నాకు
మనసునఁ దలఁచితే మాటలఁ బిలిచెనంటా
తనిసి కంభాన వెళ్లే దైవమవుగా
|
|
రేకు:0278-06 గుండక్రియ సం 03-452 వైష్ణవ భక్తి
పల్లవి : |
ఏ పాటి తన కర్మ మాపాటి కాపాటె
శ్రీపతిదాసుఁ డయితే చిహ్న లిటువలెఁ బో
|
|
చ. 1: |
అందరిని నిర్మలులే యని తలఁచిన తన-
నింద లేని మనసే నిర్మలము
మందలించి లోకులతో మంచి మాఁట లాడితేను
బందెలేని తన నోరే భావించ మంచిది.
|
|
చ. 2: |
అంతటాను హరి యున్నాఁడని చూచినఁ దన -
యంతరంగమున నుండు నీ దేవుఁడే
చింతించి యీ జగము చేకొని పావనమంటే
పంతపు తన దేహముఁ బరమపావనమే
|
|
చ. 3: |
పుట్టితేఁ దన పాలికిఁ బుట్టే నీ ప్రపంచము
దట్టమైన పుట్టెల్లఁ దనతోడిదే
యిట్టే శ్రీవేంకటేశుఁ డిచ్చినాఁడీ గుణము
పట్టమై నావద్దనుండు పరమవిజ్ఞానము
|
|