రేకు: 0279-01 రామక్రియ సం: 03-453 విష్ణు కీర్తనం
| పల్లవి : |
బలువుఁడు నాతఁడే బంధువుఁడు నాతఁడే
తలఁ చాతనికి మొక్కఁ దగులింతే నేము
|
|
| చ. 1: |
దైవమే భారకుఁడు ధరణి రక్షించుటకు
భావింప నరులచేఁత్ర పనిలేదు.
శ్రీవల్లభుఁ డతఁడు నేసినట్టల్లా నవును
వావాత ననుభవించేవారమింతే నేము
|
|
| చ. 2: |
హరియే స్వతంత్రుఁడు అన్నిపనులుగాఁ జేయ
పరుల వుద్యోగాలు పనిలేవు
సురనాథుఁ డాతఁడు చూచినట్టల్లా నవును
వరుసతోఁ దిరిగాడేవారమింతే నేము
|
|
| చ. 3: |
సకలేశుఁడే కర్త జగములు గాచుటకు
ప్రకటించ నేర్పులు పనిలేవు
వొకట శ్రీవేంకటేశుఁ డొనరించినట్లవును
సుకియించి పొగడేటి సుద్దులింతే నేము
|
|
రేకు: 0279-02 బౌళి సం: 03-454 అధ్యాత్మ
| పల్లవి : |
వద్దిక నోపము వట్టి స్వతంత్రము
వొద్దిక శాంతితో నుండేమయ్యా
|
|
| చ. 1: |
నడవక మానవు నానాజగములు
కడఁగిన హరిసంకల్పానను
వుడుగ కిందు నా వుద్యోగమేఁటిది
నడుమనే కనుఁగొని నవ్వేమయ్యా
|
|
| చ. 2: |
కలుగక మానదు కాఁగల భోగము
కలిమిఁ బురాకృత కర్మమిది
అలసి యిందు నా యాస లేమిటికి
కలిగిన పాటే కానీవయ్యా
|
|
| చ. 3: |
తగులక మానదు తన సంసారము
వెగటగు మాయావిలాసము
అగపడి శ్రీవేంకటాధిపు కృపచే
తగిన పాటినే తనిసేమయ్యా
|
|
రేకు: 0279-03 దేవగాంధారి సం: 03-455 శరణాగతి
| పల్లవి : |
ఒక్కమాటు శరణుని వుండేనింతే కాక
పెక్కు విధముల నెట్టు పెనఁగేనయ్యా
|
|
| చ. 1: |
నాలికె వొక్కటే నీ నామము లనంతము
పోలించి నే నిన్నెట్టు పొగడేదయ్యా
వోలి నాకన్నులు రెండే వొగి నీ మూర్తులు పెక్కు
పోలి నే నిన్నెటువలెఁ జూచెదనయ్యా
|
|
| చ. 2: |
వట్ట నా చేతులు రెండే పదములు నీకుఁ బెక్కు
వొట్టి నిన్నుఁ బూజించ నోపికేదయ్యా
గట్టి నాచెవు లిసుమంత కథలు నీకవియెన్నో
పట్టపు నేనెట్టు విని భజియించేనయ్యా
|
|
| చ. 3: |
యేమిటాఁ జిక్కవు నీవు యింత దేవుఁడవుగాన
కామించి నీడాగు మోచి గతిగ నేను
యీ మేర శ్రీవేంకటేశ నీవే నన్నుఁ గావు
దీమసాన నిఁక వేరేతెరువు లేదయ్యా
|
|
రేకు: 0279-04 సామంతం సం: 03-456 భక్తి
| పల్లవి : |
గరిమల నెరఁగరుఁ గాక మానవులు
సిరులఁ దియ్యని నోరఁ జేఁదు మేసేదా
|
|
| చ. 1: |
హరినారాయణ యనియెడి నోరను
ధర నితరుల పేళ్లు దడవుటెట్టు
సరవితో వేదములు చదివేటి నోరను
పరులమీఁది పదాలు పాడేదా
|
|
| చ. 2: |
మునుప శ్రీపతికి మ్రొక్కిన చేతుల
అనరుహులకు దండమనుట యెట్టు
మునుకొని పూవులు ముడిచిన సిరసున
కనలి కట్టెలు మోచి కాకయ్యేదా
|
|
| చ. 3: |
బలిమి శ్రీవేంకటపతిఁ గొలిచినవారు
తెలియ కల్పులఁ గొల్పి తిరుగుటెట్లు
జలధి దాఁటేవాఁడు సరి నోడ వుండఁగ
వలవని జోలితో వదరు వట్టేదా
|
|
రేకు: 0279-05 బౌళి సం: 03-457 శరణాగతి
| పల్లవి : |
వేళ లేదు జాడ లేదు వీని తోడిదే పాటు
కూళఁడనై తిరిగేను గుణమేది నాకు
|
|
| చ. 1: |
వేగిరించి పెరరేఁచి వేసరించీఁ బనులు
సాగి ముందరఁ బొలసి చలపట్టీ సిరులు
జాగు సేసి వచ్చి వచ్చి చవి చూపీఁ బాయము
యేగతి నిన్నుఁ దలఁతు నేది బుద్ధి నాకు
|
|
| చ. 2: |
తన్నుఁదానే వచ్చి వచ్చి తగిలీ లంపటము
వున్నతి భోగముల నోరూరించీ సుఖము
కన్నచోనే యెలయించి కదిమీ సంసారము
యెన్నఁడు నిన్నుఁ దలఁతు నెఱుకేది నాకు
|
|
| చ. 3: |
తాలిమితో మీఁద మీఁదఁ దరవయ్యీఁ గర్మము
నాలితోడ సన్నసేనీ నవ్వు నవ్వి మర్మము
యేలితివి శ్రీవేంకటేశ్వరుఁడ నన్ను నీవు
సీలాన నీ వాఁడనైతిఁ జెప్పనేది నాకు
|
|
రేకు: 0279-06 లలిత సం: 03-458 అధ్యాత్మ
| పల్లవి : |
అంతర్యామీ వో అంతర్యామీ
బంతి నాకేమిగల్లా నా పాలివాఁడవు గావా
|
|
| చ. 1: |
దొంతులై అన్ని యోనులాఁ దొల్లి నేఁ బుట్టేటినాఁడే
అంతరాత్మవైనవాఁడ వటు నీవేకా
ఇంతట విడిచేవా నన్నింద్రియాలఁ గట్టివేసి
పొంతఁ జూచేవిటు నాకుఁ బొత్తులకాఁపవుగా
|
|
| చ. 1: |
తొడరి స్వర్గనరక దుఃఖసుఖములనాఁడు
అడరి కర్మసాక్షివటు నీవేకా
విడువ వెప్పుడు నన్ను విషయాలఁ జిక్కినాఁడ
కడ నూరకుండనేల కన్నవాఁడవు గావా
|
|
| చ. 1: |
నీ చేతఁగానిది లేదు నీవు నాకుఁ బ్రాణమవు
కాచుటకు నీకంటే నొక్కరు వచ్చేరా
చేచేత శ్రీవేంకటేశ చేరి నీకు శరణంటి
యేచి నన్ను మన్నించితివిది నీ తేజముగాదా
|
|
