తే హి ద్యావాపృథివీ విశ్వశమ్భువ ఋతావరీ రజసో ధారయత్కవీ |
సుజన్మనీ ధిషణే అన్తర్ ఈయతే దేవో దేవీ ధర్మణా సూర్యః శుచిః || 1-160-01
ఉరువ్యచసా మహినీ అసశ్చతా పితా మాతా చ భువనాని రక్షతః |
సుధృష్టమే వపుష్యే న రోదసీ పితా యత్ సీమ్ అభి రూపైర్ అవాసయత్ || 1-160-02
స వహ్నిః పుత్రః పిత్రోః పవిత్రవాన్ పునాతి ధీరో భువనాని మాయయా |
ధేనుం చ పృశ్నిం వృషభం సురేతసం విశ్వాహా శుక్రమ్ పయో అస్య దుక్షత || 1-160-03
అయం దేవానామ్ అపసామ్ అపస్తమో యో జజాన రోదసీ విశ్వశమ్భువా |
వి యో మమే రజసీ సుక్రతూయయాజరేభి స్కమ్భనేభిః సమ్ ఆనృచే || 1-160-04
తే నో గృణానే మహినీ మహి శ్రవః క్షత్రం ద్యావాపృథివీ ధాసథో బృహత్ |
యేనాభి కృష్టీస్ తతనామ విశ్వహా పనాయ్యమ్ ఓజో అస్మే సమ్ ఇన్వతమ్ || 1-160-05
