అధర్వణవేదము - కాండము 13 - సూక్తము 1

←ముందరి అధ్యాయము

అధర్వణవేదము (అధర్వణవేదము - కాండము 13 - సూక్తము 1)

తరువాతి అధ్యాయము→

ఉదేహి వాజిన్యో అప్స్వన్తరిదం రాష్ట్రం ప్ర విశ సూనృతావత్ |

యో రోహితో విశ్వమిదం జజాన స త్వా రాష్ట్రాయ సుభృతం బిభర్తు ||1||

ఉద్వాజ ఆ గన్యో అప్స్వన్తర్విశ ఆ రోహ త్వద్యోనయో యాః |

సోమం దధానో ऽప ఓషధీర్గాశ్చతుష్పదో ద్విపద ఆ వేశయేహ ||2||

యూయముగ్రా మరుతః పృశ్నిమాతర ఇన్ద్రేణ యుజా ప్ర మృణీత శత్రూన్ |

ఆ వో రోహితః శృణవత్సుదానవస్త్రిషప్తాసో మరుతః స్వాదుసంముదః ||3||

రుహో రురోహ రోహిత ఆ రురోహ గర్భో జనీనాం జనుషాముపస్థమ్ |

తభిః సంరబ్ధమన్వవిన్దన్షడుర్వీర్గాతుం ప్రపశ్యన్నిహ రాష్ట్రమాహాః ||4||

ఆ తే రాష్ట్రమిహ రోహితో ऽహార్షీద్వ్యాస్థన్మృధో అభయం తే అభూత్ |

తస్మై తే ద్యావాపృథివీ రేవతీభిః కామం దుహాతామిహ శక్వరీభిః ||5||

రోహితో ద్యావాపృథివీ జజాన తత్ర తన్తుం పరమేష్ఠీ తతాన |

తత్ర శిశ్రియే ऽజ ఏకపాదో ऽదృంహద్ద్యావాపృథివీ బలేన ||6||

రోహితో ద్యావాపృథివీ అదృంహత్తేన స్వ స్తభితం తేన నాకః |

తేనాన్తరిక్షం విమితా రజాంసి తేన దేవా అమృతమన్వవిన్దన్ ||7||

వి రోహితో అమృశద్విశ్వరూపం సమాకుర్వాణః ప్రరుహో రుహశ్చ |

దివం రూఢ్వా మహతా మహిమ్నా సం తే రాష్ట్రమనక్తు పయసా ఘృతేన ||8||

యాస్తే రుహః ప్రరుహో యాస్త ఆరుహో యాభిరాపృణాసి దివమన్తరిక్షమ్ |

తాసాం బ్రహ్మణా పయసా వవృధానో విశి రాష్ట్రే జాగృహి రోహితస్య ||9||

యస్తే విశస్తపసః సంబభూవుర్వత్సం గాయత్రీమను తా ఇహాగుః |

తాస్త్వా విశన్తు మనసా శివేన సంమాతా వత్సో అభ్యేతు రోహితః ||10||

ఊర్ధ్వో రోహితో అధి నాకే అస్థాద్విశ్వా రూపాణి జనయన్యువా కవిః |

తిగ్మేనాగ్నిర్జ్యోతిషా వి భాతి తృతీయే చక్రే రజసి ప్రియాణి ||11||

సహస్రశృఙ్గో వృషభో జాతవేదా ఘృతాహుతః సోమపృష్ఠః సువీరః |

మా మా హాసీన్నాథితో నేత్త్వా జహాని గోపోషం చ మే వీరపోషం చ ధేహి ||12||

రోహితో యజ్ఞస్య జనితా ముఖం చ రోహితాయ వాచా శ్రోత్రేణ మనసా జుహోమి |

రోహితం దేవా యన్తి సుమనస్యమానాః స మా రోహైః సామిత్యై రోహయతు ||13||

రోహితో యజ్ఞం వ్యదధాద్విశ్వకర్మణే తస్మాత్తేజాంస్యుప మేమాన్యాగుః |

వోచేయం తే నాభిం భువనస్యాధి మజ్మని ||14||

ఆ త్వా రురోహ బృహత్యుత పఙ్క్తిరా కకుబ్వర్చసా జాతవేదః |

ఆ త్వా రురోహోష్ణిహాక్షరో వషట్కార ఆ త్వా రురోహ రోహితో రేతసా సహ ||15||

అయం వస్తే గర్భం పృథివ్యా దివం వస్తే ऽయమన్తరిక్షమ్ |

అయం బ్రధ్నస్య విష్టపి స్వర్లోకాన్వ్యానశే ||16||

వాచస్పతే పృథివీ నః స్యోనా స్యోనా యోనిస్తల్పా నః సుశేవా |

ఇహైవ ప్రాణః సఖ్యే నో అస్తు తం త్వా పరమేష్ఠిన్పర్యగ్నిరాయుషా వర్చసా దధాతు ||17||

వాచస్పత ఋతవః పఞ్చ యే నౌ వైశ్వకర్మణాః పరి యే సంబభూవుః |

ఇహైవ ప్రాణః సఖ్యే నో అస్తు తం త్వా పరమేష్ఠిన్పరి రోహిత ఆయుషా వర్చసా దధాతు ||18||

వాచస్పతే సౌమనసం మనశ్చ గోష్ఠే నో గా జనయ యోనిషు ప్రజాః |

ఇహైవ ప్రాణః సఖ్యే నో అస్తు తం త్వా పరమేష్ఠిన్పర్యహమాయుషా వర్చసా దధాతు ||19||

పరి త్వా ధాత్సవితా దేవో అగ్నిర్వర్చసా మిత్రావరుణావభి త్వా |

సర్వా అరాతీరవక్రామన్నేహీదం రాష్ట్రమకరః సునృతావత్ ||20||

యం త్వా పృషతీ రథే ప్రష్టిర్వహతి రోహిత |

శుభా యాసి రిణన్నపః ||21||

అనువ్రతా రోహిణీ రోహితస్య సూరిః సువర్ణా బృహతీ సువర్చాః |

తయా వాజాన్విశ్వరూపాం జయేమ తయా విశ్వాః పృతనా అభి ష్యామ ||22||

ఇదం సదో రోహిణీ రోహితస్యాసౌ పన్థాః పృషతీ యేన యాతి |

తాం గన్ధర్వాః కశ్యపా ఉన్నయన్తి తాం రక్షన్తి కవయో ऽప్రమాదమ్ ||23||

సూర్యస్యాశ్వా హరయః కేతుమన్తః సదా వహన్త్యమృతాః సుఖం రథమ్ |

ఘృతపావా రోహితో భ్రాజమానో దివం దేవః పృషతీమా వివేశ ||24||

యో రోహితో వృషభస్తిగ్మశృఙ్గః పర్యగ్నిం పరి సూర్యం బభూవ |

యో విష్టభ్నాతి పృథివీం దివం చ తస్మాద్దేవా అధి సృష్టీః సృజన్తే ||25||

రోహితో దివమారుహన్మహతః పర్యర్ణవాత్ |

సర్వో రురోహ రోహితో రుహః ||26||

వి మిమీష్వ పయస్వతీం ఘృతాచీం దేవానాం ధేనురనపస్పృగేషా |

ఇన్ద్రః సోమం పిబతు క్షేమో అస్త్వగ్నిః ప్ర స్తౌతు వి మృధో నుదస్వ ||27||

సమిద్ధో అగ్నిః సమిధానో ఘృతవృద్ధో ఘృతాహుతః |

అభీషాట్విశ్వాషాడగ్నిః సపత్నాన్హన్తు యే మమ ||28||

హన్త్వేనాన్ప్ర దహత్వరిర్యో నః పృతన్యతి |

క్రవ్యాదాగ్నినా వయం సపత్నాన్ప్ర దహామసి ||29||

అవాచీనానవ జహీన్ద్ర వజ్రేణ బాహుమాన్ |

అధా సపత్నాన్మామకానగ్నేస్తేజోభిరాదిషి ||30||

అగ్నే సపత్నానధరాన్పాదయాస్మద్వ్యథయా సజాతముత్పిపానం బృహస్పతే |

ఇన్ద్రాగ్నీ మిత్రావరుణావధరే పద్యన్తామప్రతిమన్యూయమానాః ||31||

ఉద్యంస్త్వం దేవ సూర్య సపత్నానవ మే జహి |

అవైనానశ్మనా జహి తే యన్త్వధమం తమః ||32||

వత్సో విరాజో వృషభో మతీనామా రురోహ శుక్రపృష్ఠో ऽన్తరిక్షమ్ |

ఘృతేనార్కమభ్యర్చన్తి వత్సం బ్రహ్మ సన్తం బ్రహ్మణా వర్ధయన్తి ||33||

దివం చ రోహ పృథివీం చ రోహ రాష్ట్రం చ రోహ ద్రవిణం చ రోహ |

ప్రజాం చ రోహామృతం చ రోహ రోహితేన తన్వం సం స్పృషస్వ ||34||

యే దేవా రాష్ట్రభృతో ऽభితో యన్తి సూర్యమ్ |

తైష్టే రోహితః సమ్విదానో రాష్ట్రం దధాతు సుమనస్యమానః ||35||

ఉత్త్వా యజ్ఞా బ్రహ్మపూతా వహన్త్యధ్వగతో హరయస్త్వా వహన్తి |

తిరః సముద్రమతి రోచసే ऽర్ణవమ్ ||36||

రోహితే ద్యావాపృథివీ అధి శ్రితే వసుజితి గోజితి సంధనాజితి |

సహస్రం యస్య జనిమాని సప్త చ వోచేయం తే నాభిం భువనస్యాధి మజ్మని ||37||

యశా యాసి ప్రదిశో దిశశ్చ యశాః పశూనాముత చర్షణీనామ్ |

యశాః పృథివ్యా అదిత్యా ఉపస్థే ऽహం భూయాసం సవితేవ చారుః ||38||

అముత్ర సన్నిహ వేత్థేతః సంస్తాని పశ్యసి |

ఇతః పశ్యన్తి రోచనం దివి సూర్యం విపశ్చితమ్ ||39||

దేవో దేవాన్మర్చయస్యన్తశ్చరస్యర్ణవే |

సమానమగ్నిమిన్ధతే తం విదుః కవయః పరే ||40||

అవః పరేణ పర ఏనావరేణ పదా వత్సం బిబ్రతీ గౌరుదస్థాత్ |

సా కద్రీచీ కం స్విదర్ధం పరాగాత్క్వ స్విత్సూతే నహి యూథే అస్మిన్ ||41||

ఏకపదీ ద్విపదీ సా చతుష్పద్యష్టాపదీ నవపదీ బభూవుషీ |

సహస్రాక్షరా భువనస్య పఙ్క్తిస్తస్యాః సముద్రా అధి వి క్షరన్తి ||42||

ఆరోహన్ద్యామమృతః ప్రావ మే వచః |

ఉత్త్వా యజ్ఞా బ్రహ్మపూతా వహన్త్యధ్వగతో హరయస్త్వా వహన్తి ||43||

వేద తత్తే అమర్త్య యత్త ఆక్రమణం దివి |

యత్తే సధస్థం పరమే వ్యోమన్ ||44||

సూర్యో ద్యాం సూర్యః పృఠివీం సూర్య ఆపోऽతి పశ్యతి |

సూర్యో భూతస్యైకం చక్షురా రురోహ దివం మహీమ్ ||45||

ఉర్వీరాసన్పరిధయో వేదిర్భూమిరకల్పత |

తత్రైతావగ్నీ ఆధత్త హిమం ఘ్రంసం చ రోహితః ||46||

హిమం ఘ్రంసం చాధాయ యూపాన్కృత్వా పర్వతాన్ |

వర్షాజ్యావగ్నీ ఈజాతే రోహితస్య స్వర్విదః ||47||

స్వర్విదో రోహితస్య బ్రహ్మణాగ్నిః సమిధ్యతే |

తస్మాద్ఘ్రంసస్తస్మాద్ధిమస్తస్మాద్యజ్ఞో ऽజాయత ||48||

బ్రహ్మణాగ్నీ వావృధానౌ బ్రహ్మవృద్ధౌ బ్రహ్మాహుతౌ |

బ్రహ్మేద్ధావగ్నీ ఈజాతే రోహితస్య స్వర్విదః ||49||

సత్యే అన్యః సమాహితో ऽప్స్వన్యః సమిధ్యతే |

బ్రహ్మేద్ధావగ్నీ ఈజాతే రోహితస్య స్వర్విదః ||50||

యం వాతః పరిశుమ్భతి యం వేన్ద్రో బ్రహ్మణస్పతిః |

బ్రహ్మేద్ధావగ్నీ ఈజాతే రోహితస్య స్వర్విదః ||51||

వేదిం భూమిం కల్పయిత్వా దివం కృత్వా దక్షిణామ్ |

ఘ్రంసం తదగ్నిం కృత్వా చకార విశ్వమాత్మన్వద్వర్షేణాజ్యేన రోహితః ||52||

వర్షమాజమ్ఘ్రంసో అగ్నిర్వేదిర్భూమిరకల్పత |

తత్రైతాన్పర్వతానగ్నిర్గీర్భిరూర్ధ్వాఁ అకల్పయత్ ||53||

గీర్భిరూర్ధ్వాన్కల్పయిత్వా రోహితో భూమిమబ్రవీత్ |

త్వయీదం సర్వం జాయతాం యద్భూతం యచ్చ భావ్యమ్ ||54||

స యజ్ఞః ప్రథమో భూతో భవ్యో అజాయత |

తస్మాద్ధ జజ్ఞ ఇదం సర్వం యత్కిం చేదం విరోచతే రోహితేన ఋషిణాభృతమ్ ||55||

యశ్చ గాం పదా స్పురతి ప్రత్యఙ్సూర్యం చ మేహతి |

తస్య వృశ్చామి తే మూలం న ఛాయాం కరవో ऽపరమ్ ||56||

యో మాభిఛాయమత్యేషి మాం చాగ్నిం చాన్తరా |

తస్య వృశ్చామి తే మూలం న ఛాయాం కరవో ऽపరమ్ ||57||

యో అద్య దేవ సూర్య త్వాం చ మాం చాన్తరాయతి |

దుష్వప్న్యం తస్మిం ఛమలం దురితాని చ మృజ్మహే ||58||

మా ప్ర గామ పథో వయం మా యజ్ఞాదిన్ద్ర సోమినః |

మాన్త స్థుర్నో అరాతయః ||59||

యో యజ్ఞస్య ప్రసాధనస్తన్తుర్దేవేష్వాతతః |

తమాహుతమశీమహి ||60||

←ముందరి అధ్యాయము

అధర్వణవేదము

తరువాతి అధ్యాయము→

మూస:అధర్వణవేదము