శుక్ల యజుర్వేదము - అధ్యాయము 26
| ←ముందరి అధ్యాయము | శుక్ల యజుర్వేదము (శుక్ల యజుర్వేదము - అధ్యాయము 26) | తరువాతి అధ్యాయము→ |
అగ్నిశ్చ పృథివీ చ సంనతే తే మే సం నమతామదః |
వాయుశ్చాన్తరిక్షం చ సంనతే తే మే సం నమతామదః |
ఆదిత్యశ్చ ద్యౌశ్చ సంనతే తే మే సం నమతామదః |
ఆపశ్చ వరుణశ్చ సంనతే తే మే సం నమతామదః |
సప్త సఁసదో అష్టమీ భూతసాధనీ |
సకామాఁ అధ్వనస్కురు సంజ్ఞానమస్తు మే మునా ||
యథేమాం వాచం కల్యాణీమావదాని జనేభ్యః |
బ్రహ్మరాజన్యాభ్యాఁ శూద్రాయ చార్యాయ చ స్వాయ చారణాయ |
ప్రియో దేవానాం దక్షిణాయై దాతురిహ భూయాసమయం మే కామః
సమృధ్యతాముప మాదో నమతు ||
బృహస్పతే అతి యదర్యో అర్హాద్ద్యుమద్విభాతి క్రతుమజ్జనేషు |
యద్దీదయచ్ఛవస ఋతప్రజాత తదస్మాసు ద్రవిణం ధేహి చిత్రమ్ |
ఉపయామగృహీతో సి బృహస్పతయే త్వా |
ఏష తే యోనిర్బృహస్పతయే త్వా ||
ఇన్ద్ర గోమన్నిహా యాహి పిబా సోమఁ శతక్రతో |
విద్యద్భిర్గ్రావభిః సుతమ్ |
ఉపయామగృహీతో సీన్ద్రాయ త్వా గోమతే |
ఏష తే యోనిరిన్ద్రాయ త్వా గోమతే ||
ఇన్ద్రా యాహి వృత్రహన్పిబా సోమఁ శతక్రతో |
గోమద్భిర్గ్రావభిః సుతమ్ |
ఉపయామగృహీతో సీన్ద్రాయ త్వా గోమతే |
ఏష తే యోనిరిన్ద్రాయ త్వా గోమతే ||
ఋతావానం వైశ్వానరమృతస్య జ్యోతిషస్పతిమ్ |
అజస్రం ఘర్మమీమహే |
ఉపయామగృహీతో సి వైశ్వానరాయ త్వా |
ఏష తే యోనిర్వైశ్వానరాయ త్వా ||
వైశ్వానరస్య సుమతౌ స్యామ రాజా హి కం భువనానామభిశ్రీః |
ఇతో జాతో విశ్వమిదం వి చష్టే వైశ్వానరో యతతే సూర్యేణ |
ఉపయామగృహీతో సి వైశ్వానరాయ త్వా |
ఏష తే యోనిర్వైశ్వానరాయ త్వా ||
వైశ్వానరో న ఊతయ ఆ ప్ర యాతు పరావతః |
అగ్నిరుక్థేన వాహసా |
ఉపయామగృహీతో సి వైశ్వానరాయ త్వా |
ఏష తే యోనిర్వైశ్వానరాయ త్వా ||
అగ్నిరృషిః పవమానః పాఞ్చజన్యః పురోహితః |
తమీమహే మహాగయమ్ |
ఉపయామగృహీతో స్యగ్నయే త్వా వర్చసే |
ఏష తే యోనిరగ్నయే త్వా వర్చసే ||
మహాఁ ఇన్ద్రో వజ్రహస్తః షోడశీ శర్మ యచ్ఛతు |
హన్తు పాప్మానం యో స్మాన్ద్వేష్టి |
ఉపయామగృహీతో సి మహేన్ద్రాయ త్వా |
ఏష తే యోనిర్మహేన్ద్రాయ త్వా ||
తం వో దస్మమృతీషహం వసోర్మన్దానమన్ధసః |
అభి వత్సం న స్వసరేషు ధేనవ ఇన్ద్రం గీర్భిర్నవామహే ||
యద్వాహిష్ఠం తదగ్నయే బృహదర్చ విభావసో |
మహిషీవ త్వద్రయిస్త్వద్వాజా ఉదీరతే ||
ఏహ్యూ షు బ్రవాణి తే గ్న ఇత్థేతరా గిరః |
ఏభిర్వర్ధాస ఇన్దుభిః ||
ఋతవస్తే యజ్ఞం వి తన్వన్తు మాసా రక్షన్తు తే హవిః |
సంవత్సరస్తే యజ్ఞం దధాతు నః ప్రజాం చ పరి పాతు నః ||
ఉపహ్వరే గిరీణాఁ సంగమే చ నదీనామ్ |
ధియా విప్రో అజాయత ||
ఉచ్చా తే జాతమన్ధసో దివి సద్భూమ్యా దదే |
ఉగ్రఁ శర్మ మహి శ్రవః ||
స న ఇన్ద్రాయ యజ్యవే వరుణాయ మరుద్భ్యః |
వరివోవిత్పరి స్రవ ||
ఏనా విశ్వాన్యర్య ఆ ద్యుమ్నాని మానుషాణామ్ |
సిషాసన్తో వనామహే ||
అను వీరైరను పుష్యాస్మ గోభిరన్వశ్వైరను సర్వేణ పుష్టైః |
అను ద్విపదాను చతుష్పదా వయం దేవా నో యజ్ఞమృతుథా నయన్తు ||
అగ్నే పత్నీరిహా వహ దేవానాముశతీరుప |
త్వష్టారఁ సోమపీతయే ||
అభి యజ్ఞం గృణీహి నో గ్నావో నేష్టః పిబ ఋతునా |
త్వఁ హి రత్నధా అసి ||
ద్రవిణోదాః పిపీషతి జుహోత ప్ర చ తిష్ఠత |
నేష్ట్రాదృతుభిరిష్యత ||
తవాయఁ సోమస్త్వమేహ్యర్వాఙ్ఛశ్వత్తమఁ సుమనా అస్య పాహి |
అస్మిన్యజ్ఞే బర్హిష్యా నిషద్యా దధిష్వేమం జఠర ఇన్దుమిన్ద్ర ||
అమేవ నః సుహవా ఆ హి గన్తన ని బర్హిషి సదతనా రణిష్టన |
అథా మన్దస్వ జుజుషాణో అన్ధసస్త్వష్టర్దేవేభిర్జనిభిః సుమద్గణః ||
స్వాదిష్ఠయా మదిష్ఠయా పవస్వ సోమ ధారయా |
ఇన్ద్రాయ పాతవే సుతః ||
రక్షోహా విశ్వచర్షణిరభి యోనిమయోహతమ్ |
ద్రుణా సధస్థమాసదత్ ||
| ←ముందరి అధ్యాయము | శుక్ల యజుర్వేదము | తరువాతి అధ్యాయము→ |