శశికళ/అక్కసురాలు
అక్కసురాలు
ఒక్కణ్ణై ఎక్కణ్ణో
సుక్కి పోయి సోలి యుంటి
మక్కువ ఇంతైనలేని అక్కసురాలా !
టక్కులాడి వై పోతివె
చక్కని దానా !
నా పూజలు మోసమంట
నా ప్రార్ధన వ్యర్ధమంట
నన్నొక పెరవాని చేసి
అన్నెకారి మాటలంటి వక్కసురాలా !
టక్కులాడి వై పోతివె చక్కనిదానా !
ఒక్కణ్ణై ఎక్కణ్ణో
సుక్కి పోయి సోలి యుంటి !
మక్కువ ఇంతైనలేదె అక్కసురాలా !
కళ్లల్లో శీతలాలు
కంఠంలో కర్కశోక్తి
పెడమోమై తిరిగినావు
ఎడదలోన దయలుమరిగి అక్కసురాలా !
టక్కులాడి వైపోతివె చక్కనిదానా !
ఒక్కణ్ణై ఎక్కణ్ణో
సుక్కిపోయి సోలియుంటి !
మక్కువ యింతైనలేదె అక్కసురాలా !
ఒక్కణ్ణై ఎక్కణ్ణో
చిక్కినట్టి ఆశ మనసు
ఉళ్లంటక ఏళ్లంటక
ముళ్లదారి పడిపోతిని అక్కసురాలా !
టక్కులాడి వైపోతివె చక్కనిదానా !
ఒక్కణ్ణై ఎక్కణ్ణో
సుక్కిపోయి సోలియుంటి
మక్కువ ఇంతైనలేదొ అక్కసురాలా !
ఒక్కణ్ణై ఎక్కణ్ణో
ఒదిగి ఉంటి ఉస్సురంటు
కలలు రాక నిదురలేక
కళల సీమ చేరబోక
ఏలాగో ఏలాగో
కాలంతో ప్రవహిస్తిని హో అక్కసురాలా !
టక్కులాడి వైపోతివె చక్కనిదానా !
ఒక్కణ్ణై ఎక్కణ్ణో
సుక్కిపోయి సోలియుంటి
మక్కువ ఇంతైనలేదె అక్కసురాలా !