రక్షించు దీనుని రామ రామ నీ
పున్నగవరాళి రాగం త్రిపుట తాళం
ప: రక్షించు దీనుని రామ రామ నీ
రమణితోడు నన్ను రక్షింపకున్న మీ
తండ్రి దశరధరాజు తోడు || రక్షించు ||
చ 1: అరుదు మీరగ విభీషణుని బ్రోచితి వల్లనాడు అట్లు
కరుణింపకున్నను మీతల్లి కౌసల్య తోడు || రక్షించు ||
చ 2: గిరిగొన్న ప్రేమ సుగ్రీవు బ్రోచితి వల్లనాడు అట్లు
సిరులియ్యకున్నను మీకులగురు వసిష్టు తోడు || రక్షించు ||
చ 3: అలివేణి యహల్య శాపము బాపితి వల్లనాడు అట్లు
కలుషములు బాపకున్న లక్ష్మణుని తోడు || రక్షించు ||
చ 4: పాపాత్ముడైన కబంధు బ్రోచితి వల్లనాడు అట్లె
నెపము లెన్నక కృపచూడకున్న మీయింటి తోడు || రక్షించు ||
చ 5: వదలక నీమీదనే నాసలు బెట్టవలసె నేడు
భద్రాద్రి రామదాసుని ఏలకున్న నీపాదము తోడు || రక్షించు ||
This work was published before January 1, 1929, and is in the public domain worldwide because the author died at least 100 years ago.