రేకు:0267-01 లలిత సం: 03-383 అద్వైతము
| పల్లవి : |
పెద్ద తెరువుండఁగాను పెడగంతలు దీసుక
పొద్దువోక యడవులఁ బుంగుడయ్యేరు
|
|
| చ. 1: |
తొల్లిటి పెద్దలెంచిరి దొడ్డవాఁడు హరియంటా
అల్లదె భారత రామాయణ భాగవతములు
ఇల్లిదె నేఁటి పెద్దలు యెవ్వరో దైవములంటా
వెల్లవిరిగా నింకా వెదకేరు
|
|
| చ. 1: |
దేవలోకమువారు దేవుఁడు శ్రీపతియని
భావించి మొరవెట్టి బ్రదికిరి
యీవల నిప్పటివారు ఇందరికి మొరవెట్టి
కావిరి నెవ్వరివారుఁ గాక వున్నారు
|
|
| చ. 1: |
నానాభూములవారు నమ్మి శ్రీవేంకటపతిఁ
గానవచ్చి యేఁటనేఁట ఘనులయ్యేరు
యీనిజ మిక్కడివారు యిన్నియుఁ దెలిశుండియు
మానక చలాలఁబోయి మాయలఁ బొందేరు
|
|
రేకు:0267-02 లలిత సం: 03-384 వైష్ణవ భక్తి
| పల్లవి : |
నాకేల విచారము నాకేల యాచారము
సాకిరైనవాఁడ నింతే సర్వేశుఁడే దిక్కు
|
|
| చ. 1: |
ప్రపంచ మధీనము పాలుపడ్డ దేహమిది
ప్రపంచముతో పాటు పరగీని
యెపుడూ నీయాతుమ యీశ్వరాధీనము
అపు డాతఁ డెట్టునిచే నట్టే అయ్యిని
|
|
| చ. 2: |
కర్మాన కధీనము కలిములు లేములు
కర్మమెట్టు గల్పించెఁ గలిగీని
అర్మిలి నాయాచార్యు నధీనము మోక్షము
ధర్మ మతని కృపను తానే వచ్చీని
|
|
| చ. 3: |
చిత్తమున కధీనము చిల్లరయింద్రియములు
చిత్తము చిక్కినప్పుడు చిక్కీనవి
హత్తి శ్రీవేంకటేశుదాస్య మధీనము జన్మము
పొత్తుల నందుకు నది పూఁచినట్టయ్యీని
|
|
రేకు: 0267-03 మాళవి సం: 03-385 ఉపమానములు
| పల్లవి : |
ఏఁటి పరిణామము మమ్మేల యడిగేరయ్య
గాఁటపుహరి యొక్కఁడే గతి మా కిఁకనయ్య
|
|
| చ. 1: |
మరుగుచు శ్రీహరి మాయలోఁ జిక్కినయట్టు
గరిమలఁ గులకాంతకాఁగిటఁ జిక్కితిమయ్య
తిరముగఁ గాలములు దిగమింగినయట్టు
సొరిది చవులు మింగుచు నున్నారమయ్య
|
|
| చ. 2: |
జననిగర్భములోన చక్కఁగా మునిఁగినట్టు
మునుకొని నిద్దురల మునిఁగి వున్నారమయ్య
చనవునఁ గర్మమనే జలధిలో నున్నట్టు
ధనధాన్యాల నడుమఁ దగిలి వున్నారమయ్య
|
|
| చ. 3: |
పేదవాఁడు నిధిగని పెక్కువ బతికినట్టు
గాదిలి శ్రీవేంకటేశుఁ గని చెలఁగితిమయ్య
యీదెస మొక్కే దైవ మెదురుగావచ్చినట్టు
ఆ దేవుఁడే మాకు నంతరాత్ముఁ డాయనయ్య
|
|
రేకు: 0267-04 బౌళి సం: 03-386 ఉపమానములు
| పల్లవి : |
సాసముఖా నడె సాసముఖా
ఆసల పరివారము అవధారు దేవా
|
|
| చ. 1: |
మత్తిలి జీవుఁడ నేటిమహిమ గలుగు రాజు
చిత్తమనియెడి పెద్ద సింహాసనం బెక్కి
బత్తితోఁ బంచేంద్రియపు పరివారము గొలువ
చిత్తజు పారుపత్యము సిసీనిదివో
|
|
| చ. 2: |
కడు మదించి నహంకారమనే యేనుగపై
యెడనెడ నెక్కి తోలీనిదె జీవుఁడను రాజు
బడిబడిఁ గర్మముల పౌఁజులు దీర్చరో
వెడమాయ పట్టణపు వీధుల నేఁగీని
|
|
| చ. 3: |
మించిన సంసారమనే మేడలో నేకాంతమున
పొంచి జీవుఁడనే రాజు భోగము భోగించఁగా
అంచెల శ్రీవేంకటేశుఁడనే దేవుఁడు వచ్చి
మంచితనమునఁ దానె మన్నించె నదివో
|
|
రేకు: 0267-05 ముఖారి సం: 03-387 వైరాగ్య చింత
| పల్లవి : |
నీకు నీ సహజమిది నాకు నా సహజమిది
యేకడా నీవే నిరుహేతుక బంధుఁడవు
|
|
| చ. 1: |
నే నిన్నుఁ దలఁచినా నెఱి నిన్ను మఱచినా
పూని నా యంతరాత్మవై వుండకపోవు
పూని నిన్నుఁ బూజించినాఁ బూజించకుండినాను
కానీలే యీశ్వరుఁడవుఁ గాక మానవు
|
|
| చ. 2: |
యిట్టె నే నడిగినా నేమీ నడుగకుండినా
జట్టిగా నీవు రక్షించక మానవు
తొట్టి నిన్ను దగ్గరినా దూరమున నుండినాను
పుట్టించి నీ గర్భములోఁ బొదలించకుండవు
|
|
| చ. 3: |
భావించి నీకు మొక్కినాఁ బరాకై మానినా -
నేవి చూచినా నీవై యిఁకఁ బాయవు
శ్రీవేంకటేశుఁడ నీవే చింతాయకుఁడవు
కావించేటి నా వుద్యోగములేమి బాఁతి
|
|
రేకు: 0267-06 రామక్రియ సం: 03-388 ఉపమానములు
| పల్లవి : |
కాంతల మానమనేటి కరవట్నాలకు దిగె
మంతనాన జీవుఁడనే మంచిమరకాఁడు
|
|
| చ. 1: |
అరిది సంసారమనే యంబుధిలోనఁ దిరిగి
వురుగతి దేహపుటోడమీఁద
సరిఁ బాపపుణ్యముల సరకులు నించుకొని
దరి చేరె జీవుఁడనే తలమరకాఁడు
|
|
| చ. 2: |
కడలేని నిట్టూర్పుగాలి విసరఁగాను
జడియుఁ గోరికలనే చాపలెత్తి
అడిబరవుగ మాయ అందునిండా నించుకొని
యెడతాఁకె జీవుఁడనే యీమరకాఁడు
|
|
| చ. 3: |
అల శ్రీవేంకటేశుఁడని యేటిమాలిమి
నలుదిక్కులకు నోడ నడపఁగాను
ములిగె ధర్మార్థకామమోక్షధనము గడించి
పలుమాఱు జీవుఁడనే బలుమరకాఁడు.
|
|
