రేకు: 0257-01 సాళంగనాట సం: 03-326 కృష్ణ
| పల్లవి : |
ఎక్కడిది వివేకమెంతవారికి నియిన్నియునీమాయఁదోయకలేదు
పక్కన అజ్ఞానపుజీవుల యీపాప మిట్లనే వుండఁగను
|
|
| చ. 1: |
విచ్చనవిడి నటు కౌరవులెదుటను విశ్వరూపు చూపినయపుడు
యిచ్చల నిను నమ్మఁగలేకేకా యింద్రజాలమనిరి
తచ్చన నిప్పటి నాస్తికజనులును తగు నీ సాకారము చూచి
నిచ్చలుఁ గల్లని నిరాకారము నిజమని తర్కించక మానుదురా
|
|
| చ. 2: |
గరుడవాహనము శంఖచక్రములు కనియుండియు ద్వాపరజనులు
ధరలో నిను హరిమూర్తెని తెలియక తమయాదవుఁడొకఁ డితఁడనిరి
సరుస దేవతాంతరములఁ గొలిచేటి చంచలచిత్తులు ఇఁక నిన్నే
పరదైవం బననేరరు సరిగా బ్రహ్మాదులలో నొకఁడవందురు
|
|
| చ. 3: |
యెఱిఁగిన దాసులు యెఱుఁగుదురు నీ వెక్కుడనుచు యేకాలమును
యెఱఁగని పామరు లెఱఁగరు నిను మతినెంతైనా నాఁడు నేఁడును
తఱితో శ్రీవేంకటేశ్వర నినుఁ గని తగు శరణాగతులున్నట్లు
మఱుఁగుననుండిన ప్రాకృతులకు నీమహిమలుగానఁగఁదరమవునా
|
|
రేకు: 0257-02 లలిత సం: 03-327 వైరాగ్య చింత
| పల్లవి : |
పుట్టినమొదలు నేను పుణ్యమేమీఁ గాననైతి
యెట్టు గాచేవయ్య నన్ను యిందిరానాథా
|
|
| చ. 1: |
కామినులఁ జూచిచూచి కన్నులఁ గొంతపాపము
వేమరు నిందలు విని వీనులఁ గొంతపాపము
నామువారఁ గల్లలాడి నాలికఁ గొంతపాపము
గోమునఁ బాపము మేనఁ గుప్పలాయ నివిగో
|
|
| చ. 2: |
కానిచోట్లకు నేఁగి కాఁగిళ్ళఁ గొంతపాపము
సేన దానాలందుకొని చేతులఁ గొంతపాపము
మానని కోపమే పెంచి మతిఁ గొంతపాపము
పూని పాపములే నాలోఁ బోగులాయ నివిగో
|
|
| చ. 3: |
చేసినట్టివాఁడఁగాన చెప్ప నీకుఁ జోటులేదు
దాఁసుడ నే నైతిఁ గొన దయ దలఁచితివయ్య
యీసరవులెల్లఁ జూచి యేమని నుతింతు నిన్ను
ఆసల శ్రీవేంకటేశ ఆయఁబోయఁ బనులు
|
|
రేకు: 0257-03 వరాళి సం: 03-328 వైరాగ్య చింత
| పల్లవి : |
కలిమిలేములెల్లా కాలము స్వభావము
తలఁపులో జ్ఞానము దక్కెడి దొకటే
|
|
| చ. 1: |
పుట్టుగులు జీవునికి పూఁచిన స్వభావము
వొట్టి యిదె సారెసారె వోమనేలా
పట్టి నానాఁటి బ్రదుకు ప్రపంచము స్వభావము
కొట్టగొన హరిముక్తి గోరెటిదొకటే
|
|
| చ. 2: |
మక్కువ సంసారము మాయలస్వభావము
చిక్కి కన్నవారికెల్లా మొక్కుకోనేలా
తక్కక రక్షించేది దైవము స్వభావము
నిక్కపు వైరాగ్యము నిలుచుట వొకటే
|
|
| చ. 3: |
కప్పిన భోగములెల్లా కర్మము స్వభావము
తప్పక ప్రియము చెప్పే దైన్యమేలా
యెప్పుడు శ్రీవేంకటేశ యెదలో నాకుఁ గలవు
చప్పుడుసేయక నీకు శరణనే దొకటే
|
|
రేకు: 0257-04 కన్నడగౌళ సం: 03-329 వైరాగ్య చింత
| పల్లవి : |
ఏమి సేయఁగల యెంతాశకుఁడను
తామసపు మనసు తనియదు నాకు
|
|
| చ. 1: |
యిలలోపల నూరేండ్లబ్రదుకే
కలవుద్యోగము కల్పాంతంబులు
నిలిచినవాఁడను నేనొక్కఁడనే
పలుసంసారము బండ్లకొలఁది
|
|
| చ. 2: |
ఆరయఁ బట్టెడు అన్నమువాఁడను
కోరిన కోర్కులు కోటానఁగోట్లు
నారవంటిదే నల్లెఁడు నాలుక
తీరవు రుచులివె తెప్పలకొలఁది
|
|
| చ. 3: |
నిరతరతిసుఖము నిమిషములోనిదే
విరహపు వెదలు వేవేలు
యిరవుగ శ్రీవేంకటేశ నీమఱఁగు
చొరఁగా నాకివి సులభములాయ
|
|
రేకు: 0257-05 లలిత సం: 03-330 శరణాగతి
| పల్లవి : |
ఎవ్వరివాఁడాఁ గాను యిదె పిరివీకులై
నవ్వుచు నీ శరణంటి నన్నుఁ గావవయ్యా
|
|
| చ. 1: |
తగఁ బంచేంద్రియములు తమవాఁడననేరు
వగఁ దల్లిదండ్రి తమవాఁడననేరు
చిగురుఁగర్మాలు తమసీమవాఁడననేరు
తెగదీ తగవు నీవే తిద్దవయ్యా
|
|
| చ. 2: |
కొందరు నరకమందు కొంతవళకు వేసేరు
కొందరు స్వర్గమువారు కొంతవళకు వేసేరు
యిందుకు నందుకుఁ బోనీ రిహలోకమందువారు
దిందుపడని వళకు తీరుచవయ్యా
|
|
| చ. 3: |
కాంతలు తమవాఁడంటాఁ గనుచూపులఁ గట్టేరు
చెంతలఁ గాంచనములు చేయిపట్టుకొనే నన్ను
ఇంతటా శ్రీవేంకటేశ యెదలోనున్నాఁడవు
వంతుకీ తగవు నీవే వహించుకోవయ్యా
|
|
