తాళ్ళపాక పదసాహిత్యం/మూడవ సంపుటం/రేకు 221
రేకు: 0221-01 లలిత సం: 03-114 కృష్ణ
పల్లవి:
చూడ నరుదాయనమ్మ సొరిది నందరికిని
వేడుకతో వచ్చి సేవించేరు బ్రహ్మాదులు
చ. 1:
కోరి చంద్రుఁడుదయించ గోకులచంద్రుడు వుట్టె-
నేరీతి నీతఁడు నాతఁ డేమౌదురో
వారిధి కొడుకతఁడు వారిధి యల్లుఁ డీతఁడు
యీరీతి నీతఁడాతని కేలికాయఁ గాని
చ. 2:
నల్లని వాఁడీతఁడాయ తెల్లని వాఁడతఁడాయ
యెల్లవారికిఁ జూడ వీరేమౌదురో
అల్లాతఁడే యమృతము అమృతనాథుఁడితఁడు
చల్లనైన హరితోడ సరిగాఁడుఁ గాని
చ. 3:
ఆతఁడు పూర్వాద్రిమీఁద నమరెఁ నిందరుఁ జూడ
నీతఁడు శ్రీవేంకటాద్రి నిరవైనాఁడు
యేతుల వుబ్బుసగ్గులు యిలమీఁద నాతనికి
చైతన్యమెప్పు డీతఁడు సింగారవిభుఁడుగాని
రేకు: 0221-02 దేసాక్షి సం: 03-115 అధ్యాత్మ
పల్లవి:
దేవత లెందున్నవారో దిష్ట మెవ్వరిఁ గానము
యీవలఁ దామే కలితే నేమని రావలదా
చ. 1:
పరమేదో ఇహమేదో బదికే జీవులకెల్ల
నరకపు దేహాలలో నానుచున్నారు
అరసి పుట్టించినట్టి అజుఁ డెందు దాఁగినాఁడో
సరిగాన మెవ్వరిఁ గొసరేమంటేను
చ. 2:
యేమి గలి గేమి సెలవెన్నటికో తమమేలు
యీ మేరఁ బ్రాణులు మాయ నీఁదుచున్నారు
భూమికి దిక్కైనవారు పొడచూపి కావవద్దా
దీముగా నిలువలేరు తెలిసేమంటేను
చ. 3:
తుదయేడ మొదలేడ తొంగి చూచేవారెవ్వరు
అదె సంసారానఁ బ్రాణులాడుచున్నారు
ఇదె శ్రీవేంకటేశ్వరుఁ డింతలో విచ్చేసి కాచె
యెదుట రక్షకుఁడైతే నిట్టుండవలదా
రేకు: 0221-03 సామంతం సం: 03-116 అధ్యాత్మ
పల్లవి:
నీవు దేవుఁడవు నే నొక జీవుఁడ
యీ విధి నిద్దరి కెంతంతరువు
చ. 1;
పొడమిన జగములు పుట్టెడి జగములు
గుడిగొనె మీ రోమకూపముల
యెడయక నీరూప మేమని ధ్యానింతు
అడరి మీవాఁడ నేననుటే కాక
చ. 2:
మునుపటి బ్రహ్మలు ముందరి బ్రహ్మలు
మొనసి మీ నాభిని మొలచేరు
ఘనుఁడవు నిన్నేగతి నేఁ దెలిసెద
అనువుగ మిము శరణనుటే కాక
చ. 3;
సహజానందము సంసారానంద-
మిహముఁ బరముగా నిచ్చేవు
అహిపతి శ్రీవేంకటాధిప నీకృప
మహిలో సేవించి మనుటే కాక
రేకు: 0221-04 ధన్నాసి సం: 03-117 శరణాగతి
పల్లవి:
శరణాగత వజ్రపంజరుఁ డీతఁడు చక్రధరుఁ డసురసంహారుఁడు
వెరవుతోడఁ దను శరణనువారి వెనుబల మీతఁడే రక్షకుఁడు
చ. 1:
హరినామోచ్చారణఁ దెగనికర్మ మవల వేరొకటున్నదా
అరసి యెందు నమ్మిక చాలక ప్రాయశ్చిత్తంబులు చెప్పుదురు
ధర నెరఁగనివారేమనినాఁ దామసులగొడవ యేమిటికి
హరిహరి యంటే దురితము లణఁగెను అతఁడే మాకిఁక రక్షకుఁడు
చ. 2:
శ్రీపతి దిక్కయి కావఁగ మరియునుఁ జేరని సంపద లిఁకనేవి
చాపలబుద్దుల (లు?) నది నమ్మక విచ్చనవిడి నోములు చెప్పుదురు
తీపులు పుట్టించి యెవ్వరేమనినఁ దెలిపి వాదడువ నేమిటికి
శ్రీపతిఁ గొలిచితి చేరె సంపదలు జిగి నితఁడే మా రక్షకుఁడు
చ. 3:
అంతరాత్మ శ్రీవేంకటేశ్వరుఁడు అన్యము భజించఁ జో టేది
యింతట నమ్మక దేవతాంతరము లేఁటేఁటివో మరి చెప్పుదురు
యెంతలేదు ప్రాకృతజనముల భ్రమ యెవ్వరిఁ గాదన నేమిటికి
యింతకు శ్రీవేంకటేశుదాసులము యీతఁడే మాకిఁక రక్షకుఁడు
రేకు: 0221-05 లలిత సం: 03-118 శరణాగతి
పల్లవి:
వెదకినఁ దెలియదు వెనక ముందరలు
పదమున నిలుపవె పరమాత్మా
చ. 1:
కోరిక లూరక కొనలు సాగఁగా
బారలు చాఁచీఁ బ్రపంచము
యీరీతి జీవులు ఇలఁ బొడమఁ బొడమ
దూరంబాయను తొలుతటి రాక
చ. 2:
కాయపు మదములు కప్పఁగఁ గప్పఁగ
ఆయము లంటీనదె మాయ
పాయక ఇందే పనుపడి పనుపడి
చాయలు మరచిరి జంతువులు
చ. 3:
బలుశరణాగతి ప్రాణులు దలఁచఁగ
నెలవున నిలిపెను నీకరుణ
ఇలపై శ్రీవేంకటేశ్వర యిహ పర-
మలవడి దొరకెను అరచేతికిని
రేకు: 0221-06 బౌళి సం: 03-119 శరణాగతి
పల్లవి:
కనకము కనకమే కడు నినుమినుమే
వెనక సరిదూఁగితే వెలువకురాదు
చ. 1:
హరిఁ గొలిచినవారి కమరు నన్నిసుఖాలు
గరిమతో వారల భాగ్యమే భాగ్యము
తెరమరఁగుల కర్మదేహులెల్ల వీరితోడ
పురుఁడు వెట్టుకోఁబోతే పోలికలు రావు
చ. 2:
భాగవతులైనవారు పట్టినదెల్లా నీడేరు
చేగదేర వారలు సేసినదే చేఁత
తీగెసంసారమత్తులు తెలియక వీరివలె
వేగినంతా నయ్యేమంటే వెరవులఁ బడవు (?)
చ. 3:
శ్రీవేంకటేశుదాసులు చేసినదెల్లా సృష్టి
యేవంకా ధ్రువపట్టమే ఇటు వారికి
కావరపు మనుజులు గతిగనేమని వారి-
తోవల నడవఁబోతేఁ దూగదు తమకును