తాళ్ళపాక పదసాహిత్యం/నాలుగవ సంపుటం/రేకు 390
రేకు: 0౩90-01 మాళవిగౌళ సం: 04-520 రామ
పల్లవి:
రాముఁడు లోకాభిరాముఁ డుదయించఁగాను
భూమిలో వాల్మీకికి పుణ్యమెల్లా దక్కెను
చ. 1:
తటుకన మారీచు తలపైఁ బోయఁ గర్మము
కుటిల శూర్పనఖ ముక్కునఁ బండెను
పటుకునఁ దెగె దైత్యభామల మెడతాళ్ళు
మటమాయదైత్యులకు మరి నూరూ నిండెను
చ. 2:
తరగె రావణు పూర్వతపములయాయుష్యము
ఖర దూషణాదులకు కాలము దీరె
గరిమ లంకకు నవగ్రహములు భేదించె
సిరుల నింద్రజిత్తాకు చినిఁగె నంతటను
చ. 3:
పొరిఁ గుంభకర్ణునికి పుట్టిన దినము వచ్చె
మరలి గండము దాఁకె మండోదరికి
పరగె నయోధ్యకు భాగ్యములు ఫలియించె
చిరమై శ్రీ వేంకటేశుచేఁతలెల్లా దక్కెను
రేకు: 0390-02 సాళంగనాట సం: 04-521 నృసింహ
పల్లవి:
జయము జయము ఇఁక జనులాల
భయములు వాసెను బ్రదికితి మిపుడు
చ. 1:
ఘన నరసింహుఁడు కంభమున వెడలె
దనుఁజులు నమసిరి ధర వెలసె
పొనిఁగె నధర్మము భూభారమడఁగె
మునుల తపము లిమ్ముల నీడేరె
చ. 2:
గరిమతో విష్ణుఁడు గద్దెపై నిలిచె
హిరణ్య కశిపుని నేపడఁచె
అరసి ప్రహ్లాదుని నన్నిటా మన్నించె
హరుఁడును బ్రహ్మయు నదె కొలిచేరు
చ. 3:
అహోబలేశుఁడు సిరి నంకమున ధరించె
బహుగతి శుభములు పాటిల్లె
యిహపరము లొసఁగె నిందును నందును
విహరించెను శ్రీవేంకటగిరిని
రేకు: 0390-03 రామక్రియ సం: 04-522 నృసింహ
పల్లవి:
గరుడాద్రి వేదాద్రి కలిమి యీపె
సిరులొసఁగీఁ జూడరో చింతామణి యీపె
చ. 1:
పాల జలధిఁ బుట్టిన పద్మాలయ యీపె
లాలిత శ్రీ నరసింహులక్ష్మి యీపె
మేలిమి లోకమాతయై మించిన మగువ యీపె
యీ లీల లోకములేలే యిందిర యీపె
చ. 2:
ఘన సంపద లొసఁగు కమలాకాంత యీపె
మనసిజుఁ గనిన రమాసతి యీపె
అనిశమఁ బాయని మహా హరి ప్రియ యీపె
ధన ధాన్య రూపపు శ్రీ తరుణి యీపె
చ. 3:
రచ్చల వెలసినట్టి రమా వనిత యీపె
మచ్చిక గలయలమేల్ఁ‌మంగ యీపె
యిచ్చట వేంకటాద్రి నీ యహోబలమునందు
నిచ్చలూఁ దావు కొనిన నిధాన మీపె
రేకు: 0390-04 సామంతం సం: 04-523 రామ
పల్లవి:
సమసె రావణుఁడు సమరములోపల
అమరులు కడు ముదమందిరి మెరసి
చ. 1:
బెరగిరి రాముని శరముల కసురలు
సురిగిరి పోట్లచురుకునను
తొరిగిరి నెత్తుటఁ దునియలు సేసిన
తిరిగిరి తరుమఁగ దిక్కులకు
చ. 2:
కూలిరి భల్లూకుల ఘోషములకు
వాలిరి వాయుజవాలహతి
వీలిరి యంగదు వివిధనాదముల
తూలిరి సుగ్రీవు దోర్బలమునను
చ. 3:
దాఁగిరి లక్ష్మణు దాకకు నులుకుచు
వీఁగిరి వనచర వితతికిని
పాఁగి శ్రీ వేంకటపతి కృపా రసమునఁ
దోఁగిరి జనులు సంతోసంబునను
రేకు: ౦౩9౦-05 శంకరాభరణం సం: 04-524 నృసింహ
పల్లవి:
ఆదిమూర్తి యీతఁడు ప్రహ్లాద వరదుఁడు
యేదెనఁ జూచినా దానె యీతఁడిది దేవుఁడు
చ. 1:
నవ్వుల మోము తోడ నరసింహ రూపు తోడ
జవ్వని తొడ మీఁదట సరస మాడ
పువ్వుల దండలు యిరు బుజాలపై వేసుకొని
వువ్విళ్ళూరఁ గొలువై వున్నాఁడు దేవుఁడు
చ. 2:
సంకుఁ జక్రములతోడ జమళి కోరల తోడ
అంకెలఁ గటియభయహస్తా లెత్తి
కంకణాలహారాలతో ఘన కిరీటము వెట్టి
పొంకమైన ప్రతాపానఁ బొదిలీ నీ దేవుఁడు
చ. 3:
నానా దేవతల తోడ నారదాదుల తోడ
గానములు వినుకొంటా గద్దెపై నుండి
ఆనుక శ్రీ వేంకటాద్రి నహో బలము నందు
తానకమై వరాలిచ్చీ దాసులకు దేవుఁడు
రేకు: 0౩90-06 బౌళిరామక్రియ సం: 04-525 హనుమ
పల్లవి:
వీఁడివో కలశాపుర వీరహనుమంతుడు
వాఁడిమి మెరసినట్టి వజ్రపాణి యితఁడు
చ. 1:
చలపట్టి జంగచాఁచి జలధి దాఁటినవాఁడు
తల కొన్న రాముని ప్రతాపపువాఁడు
యెలమి సీతకుంగరమిచ్చి మెప్పించినవాఁడు
కలగుండు వడ లంకఁ గాలిచినవాఁడు
చ. 2:
మగిడి రాఘవునకు మణి దెచ్చినట్టివాఁడు
గగనము మోచిన కాయమువాఁడు
మొగి సూర్యునిచే శాస్త్రములు చదివినవాఁడు
పగటున మీఁది బ్రహ్మ పట్టమేలే వాఁడు
చ. 3:
యిప్పుడూఁ బ్రాణముతోనే యిల దేవుఁడైనవాఁడు
చెప్పఁగొత్తైనమహిమ జెన్నొందువాఁడు
ముప్పిరి శ్రీ వేంకటేశు మూల బలమైన వాఁడు
వొప్పగు వరా లిందరి కొసగేటివాఁడు