రేకు: 0325-01 వరాళి సం: 04-142 శరణాగతి
| పల్లవి : |
ఎవ్వరివాఁడాఁగాను యేమందు నిందుకు
నవ్వుచు నాలోని హరి నన్నుఁ గావవే
|
|
| చ. 1: |
కోపులరాజులనెల్ల కొలిచి కొన్నాళ్ళు మేను
చూపుడుఁబూఁట వెట్టితి సొగసి నేను
యేపున సంసారమున ఇదిగాక కమ్మటాను
దాపుగ తొర్లుఁబూఁట తగిలించుకొంటిని
|
|
| చ. 2: |
మొదలఁ గర్మములకు మోసపోయి యీ బ్రదుకు
కుదువపెట్టితి నే గురి గానక
వెదకి కామునికి విషయములకు నే
అదివో నావయసెల్ల నాహివెట్టితిని
|
|
| చ. 3: |
ఇప్పుడే శ్రీవేంకటేశ యీడేర్చి నామనసు
కప్పిన గురుఁడు నీకు క్రయమిచ్చెను
వొప్పించి అందరు బలువుఁడు చేపట్టెననుచు
అప్పులెల్లఁబాసి నీసొమ్మైతినేనయ్యా
|
|
రేకు: 0325-02 దేసాళం సం: 04-143 శరణాగతి
| పల్లవి : |
వాసుదేవ నీవు నెలవరివి మగుడునేల
యీసరి నీవద్దనుండే యెట్టైనఁ జేయవయ్యా
|
|
| చ. 1: |
మాయదెచ్చి నాబదుకు మనుజలోకాన వేసె
కాయము సంసార వార్ధిగడ్డపై వేసె
పాయపు నాతమకము భామలవలల వేసె
చాయ నేనుండి వచ్చినడ జాడెఱఁగనయ్యా
|
|
| చ. 2: |
ఘనమైనయింద్రియాలు కర్మములవాత వేసె
మనసు సంసదయామనిలో వేసె
పనులెల్ల లంపటాల పయిఁ బక్కలా వేసె
కొనకెక్కె నేనె నాగురుతు గాననయ్యా
|
|
| చ. 3: |
అంచెల నాదినములు ఆఁకటి బారి వేసె
ముంచిన నాగుణములు మోహములు వేసె
యోంచఁగ శ్రీవేంకటేశ యెందెం దున్నాఁడనో
పొంచి నీకు శరణంటి బోధించవయ్యా
|
|
రేకు: 0325-03 బౌళి సం: 04-144 రామ
| పల్లవి : |
నమో నమో దశరధనందన రామ
కమనియ్య యాగభాగకర్త రామ
|
|
| చ. 1: |
కాకుత్సకుల రామ కౌసల్యాసుత రామ
శ్రీకరగుణోన్నత శ్రీరామ
కాకాసురవైరి రామ కౌశికవత్సల రామ
భీకరతాటకాంతకబిరుద రామ
|
|
| చ. 2: |
వారిధిబంధన రామ వాలిహరణ రామ
చారుహరకోదండభంజన రామ
ధారుణీజపతి రామదశకంఠహర రామ
సారవిభీషణాభిషేచన రామ
|
|
| చ. 3: |
అమరపాలిత రామ అయోధ్యాపతి రామ
సమరకోవిద రామ సర్వజ్ఞ రామ
విమల రామ శ్రీవేంకటగిరి రామ
రమణ శరణాగతరక్షక రామ
|
|
రేకు: 0325-04 సాళంగనాట సం: 04-145 హనుమ
| పల్లవి : |
హరికి లంకిణీహంత కంతర మిట్టున్నది
కరుణ నింత మన్నించె కమలావిభుఁడు
|
|
| చ. 1: |
విశ్వరూపు చూపినాడు విష్ణుఁడు దొల్లి యట్టె
విశ్వరూపాంజనేయుఁడు వీఁడె చూపెను
శాశ్వతుఁడై యున్నవాఁడు సర్వేశ్వరుఁడు వీఁడే
శాశ్వతుఁడై యున్నవాఁడు జగములో నీతఁడు
|
|
| చ. 2: |
ప్రాణవాయుసంబంధి పరమాత్మఁడు అట్టె
ప్రాణవాయుసుతుఁడు పవనజుఁడు
రాణింప రవివంశుఁడు రామచంద్రుడు తాను
నాణెపు రవిసుతుని నమ్మిన ప్రధాని
|
|
| చ. 3: |
దేవహితార్థముసేసఁ ద్రివిక్రముఁడు అట్టె
దేవహితార్ధమే జలధిలంఘనుఁడు
శ్రీవేంకటేశుఁడు చిన్మయమూర్తి తాను
కోవిదుఁడు జ్ఞానమూర్తి గొప్పహనుమంతుఁడు
|
|
రేకు: 0325-05 పాడి సం: 04-146 నృసింహ
| పల్లవి : |
సుగ్రీవ నారసింహుని జూడరో వాఁడె
అగ్రపూజ గొన్నవాఁడు ఆది సింహము
|
|
| చ. 1: |
దేవతలు జయపెట్టి దివినుండి పొగడఁగ
దేవులతోఁ గూడున్నాఁడు దివ్య సింహము
భావింప నెట్టనెదుట ప్రహ్లాదుఁడుండఁగాను
వేవేలు నవ్వులు నవ్వీ విజయ సింహము
|
|
| చ. 2: |
అసురలను గెలిచి అదె సింహాసనముపై
వెసఁగొలువున్నాడు వీర సింహము
పసిడివర్ణముతోడ బహుదివ్యాయుధాలతో
దెసల వెలుగొందీని ధీర సింహము
|
|
| చ. 3: |
నానాభరణాలు వెట్టి నమ్మినదాసులనెల్ల
ఆనుకొని రక్షించీఁ బ్రత్యక్ష సింహము
పూని శ్రీవేంకటాద్రిని బుధులెల్లాఁ గొలువఁగా
నానావరము లొసఁగీ మానవ సింహము
|
|
రేకు: 0325-06 శ్రీరాగం సం: 04-147 రామ
| పల్లవి : |
రామచంద్రుఁ డితఁడు రఘు వీరుఁడు
కామిత ఫలము లియ్యఁ గలెగె నిందరికి
|
|
| చ. 1: |
గౌతము భార్య పాలిటి కామధేనువు వితఁడు
ఘాతలఁ గౌశీకు పాలి కల్పవృక్షము
సీతాదేవి పాలిటి చింతామణీతఁడు
యీతఁడు దాసుల పాలి యిహ పర దైవము
|
|
| చ. 2: |
పరగ సుగ్రీవు పాలి పరమ బంధుఁడీతఁడు
సరి హనుమంతు పాలి సామ్రాజ్యము
నిరతి విభీషణుని పాలి నిధానము
గరిమ జనకు పాలి ఘన పారిజతము
|
|
| చ. 3: |
తలఁప శబరి పాలి తత్వపు రహస్యము
అలరి గుహుని పాలి ఆదిమూలము
కలఁడన్నవారి పాలి కన్ను లెదుటి మూరితి
వెలయ శ్రీ వేంకటేద్రి విభుఁడీతడు
|
|
