నాటి మాట
రాగము, అఠాణా - తాళము, రూపకము
పల్లవి
నాటి మాట మఱచుట యే!
నాటికైన మఱవ వశమ||
అనుపల్లవి
బోటి ప్రాణ మీ వంటి, ము |
మ్మాటికి నిను విడ నంటి||
చరణములు
1. మాట మూట గట్టి కొని|
పాటిదప్పి తనుట నా పొర|
పాటుగాక, మాటన నే|
పాటిర నీ సాటి దొరకు||
2. బ్రతుకు నందు లేని స్థిరత|
వెతక నేల భాషయందు!
నతుకు వేష భాష కోడు!
నతివలదే తప్పుగాక||
3. సాటి లేదు నా కంటివా!
మాట నిజము నేడు గంటి|
సాటి కలదె నమ్మి భంగ|
పాటు పడిన పడఁతి కెందు||
4.మేటివైన నీ యెద మొగ|
మాట మెటుల బాసె, నొక్క|
మాటురా, నీ యోటు మాటె
కోటి ధనము లిచ్చి కొందు!!