ఏతే అసృగ్రమ్ ఇన్దవస్ తిరః పవిత్రమ్ ఆశవః |
విశ్వాన్య్ అభి సౌభగా || 9-062-01
విఘ్నన్తో దురితా పురు సుగా తోకాయ వాజినః |
తనా కృణ్వన్తో అర్వతే || 9-062-02
కృణ్వన్తో వరివో గవే ऽభ్య్ అర్షన్తి సుష్టుతిమ్ |
ఇళామ్ అస్మభ్యం సంయతమ్ || 9-062-03
అసావ్య్ అంశుర్ మదాయాప్సు దక్షో గిరిష్ఠాః |
శ్యేనో న యోనిమ్ ఆసదత్ || 9-062-04
శుభ్రమ్ అన్ధో దేవవాతమ్ అప్సు ధూతో నృభిః సుతః |
స్వదన్తి గావః పయోభిః || 9-062-05
ఆద్ ఈమ్ అశ్వం న హేతారో ऽశూశుభన్న్ అమృతాయ |
మధ్వో రసం సధమాదే || 9-062-06
యాస్ తే ధారా మధుశ్చుతో ऽసృగ్రమ్ ఇన్ద ఊతయే |
తాభిః పవిత్రమ్ ఆసదః || 9-062-07
సో అర్షేన్ద్రాయ పీతయే తిరో రోమాణ్య్ అవ్యయా |
సీదన్ యోనా వనేష్వ్ ఆ || 9-062-08
త్వమ్ ఇన్దో పరి స్రవ స్వాదిష్ఠో అఙ్గిరోభ్యః |
వరివోవిద్ ఘృతమ్ పయః || 9-062-09
అయం విచర్షణిర్ హితః పవమానః స చేతతి |
హిన్వాన ఆప్యమ్ బృహత్ || 9-062-10
ఏష వృషా వృషవ్రతః పవమానో అశస్తిహా |
కరద్ వసూని దాశుషే || 9-062-11
ఆ పవస్వ సహస్రిణం రయిం గోమన్తమ్ అశ్వినమ్ |
పురుశ్చన్ద్రమ్ పురుస్పృహమ్ || 9-062-12
ఏష స్య పరి షిచ్యతే మర్మృజ్యమాన ఆయుభిః |
ఉరుగాయః కవిక్రతుః || 9-062-13
సహస్రోతిః శతామఘో విమానో రజసః కవిః |
ఇన్ద్రాయ పవతే మదః || 9-062-14
గిరా జాత ఇహ స్తుత ఇన్దుర్ ఇన్ద్రాయ ధీయతే |
విర్ యోనా వసతావ్ ఇవ || 9-062-15
పవమానః సుతో నృభిః సోమో వాజమ్ ఇవాసరత్ |
చమూషు శక్మనాసదమ్ || 9-062-16
తం త్రిపృష్ఠే త్రివన్ధురే రథే యుఞ్జన్తి యాతవే |
ఋషీణాం సప్త ధీతిభిః || 9-062-17
తం సోతారో ధనస్పృతమ్ ఆశుం వాజాయ యాతవే |
హరిం హినోత వాజినమ్ || 9-062-18
ఆవిశన్ కలశం సుతో విశ్వా అర్షన్న్ అభి శ్రియః |
శూరో న గోషు తిష్ఠతి || 9-062-19
ఆ త ఇన్దో మదాయ కమ్ పయో దుహన్త్య్ ఆయవః |
దేవా దేవేభ్యో మధు || 9-062-20
ఆ నః సోమమ్ పవిత్ర ఆ సృజతా మధుమత్తమమ్ |
దేవేభ్యో దేవశ్రుత్తమమ్ || 9-062-21
ఏతే సోమా అసృక్షత గృణానాః శ్రవసే మహే |
మదిన్తమస్య ధారయా || 9-062-22
అభి గవ్యాని వీతయే నృమ్ణా పునానో అర్షసి |
సనద్వాజః పరి స్రవ || 9-062-23
ఉత నో గోమతీర్ ఇషో విశ్వా అర్ష పరిష్టుభః |
గృణానో జమదగ్నినా || 9-062-24
పవస్వ వాచో అగ్రియః సోమ చిత్రాభిర్ ఊతిభిః |
అభి విశ్వాని కావ్యా || 9-062-25
త్వం సముద్రియా అపో ऽగ్రియో వాచ ఈరయన్ |
పవస్వ విశ్వమేజయ || 9-062-26
తుభ్యేమా భువనా కవే మహిమ్నే సోమ తస్థిరే |
తుభ్యమ్ అర్షన్తి సిన్ధవః || 9-062-27
ప్ర తే దివో న వృష్టయో ధారా యన్త్య్ అసశ్చతః |
అభి శుక్రామ్ ఉపస్తిరమ్ || 9-062-28
ఇన్ద్రాయేన్దుమ్ పునీతనోగ్రం దక్షాయ సాధనమ్ |
ఈశానం వీతిరాధసమ్ || 9-062-29
పవమాన ఋతః కవిః సోమః పవిత్రమ్ ఆసదత్ |
దధత్ స్తోత్రే సువీర్యమ్ || 9-062-30
