అయా వీతీ పరి స్రవ యస్ త ఇన్దో మదేష్వ్ ఆ |
అవాహన్ నవతీర్ నవ || 9-061-01
పురః సద్య ఇత్థాధియే దివోదాసాయ శమ్బరమ్ |
అధ త్యం తుర్వశం యదుమ్ || 9-061-02
పరి ణో అశ్వమ్ అశ్వవిద్ గోమద్ ఇన్దో హిరణ్యవత్ |
క్షరా సహస్రిణీర్ ఇషః || 9-061-03
పవమానస్య తే వయమ్ పవిత్రమ్ అభ్యున్దతః |
సఖిత్వమ్ ఆ వృణీమహే || 9-061-04
యే తే పవిత్రమ్ ఊర్మయో ऽభిక్షరన్తి ధారయా |
తేభిర్ నః సోమ మృళయ || 9-061-05
స నః పునాన ఆ భర రయిం వీరవతీమ్ ఇషమ్ |
ఈశానః సోమ విశ్వతః || 9-061-06
ఏతమ్ ఉ త్యం దశ క్షిపో మృజన్తి సిన్ధుమాతరమ్ |
సమ్ ఆదిత్యేభిర్ అఖ్యత || 9-061-07
సమ్ ఇన్ద్రేణోత వాయునా సుత ఏతి పవిత్ర ఆ |
సం సూర్యస్య రశ్మిభిః || 9-061-08
స నో భగాయ వాయవే పూష్ణే పవస్వ మధుమాన్ |
చారుర్ మిత్రే వరుణే చ || 9-061-09
ఉచ్చా తే జాతమ్ అన్ధసో దివి షద్ భూమ్య్ ఆ దదే |
ఉగ్రం శర్మ మహి శ్రవః || 9-061-10
ఏనా విశ్వాన్య్ అర్య ఆ ద్యుమ్నాని మానుషాణామ్ |
సిషాసన్తో వనామహే || 9-061-11
స న ఇన్ద్రాయ యజ్యవే వరుణాయ మరుద్భ్యః |
వరివోవిత్ పరి స్రవ || 9-061-12
ఉపో షు జాతమ్ అప్తురం గోభిర్ భఙ్గమ్ పరిష్కృతమ్ |
ఇన్దుం దేవా అయాసిషుః || 9-061-13
తమ్ ఇద్ వర్ధన్తు నో గిరో వత్సం సంశిశ్వరీర్ ఇవ |
య ఇన్ద్రస్య హృదంసనిః || 9-061-14
అర్షా ణః సోమ శం గవే ధుక్షస్వ పిప్యుషీమ్ ఇషమ్ |
వర్ధా సముద్రమ్ ఉక్థ్యమ్ || 9-061-15
పవమానో అజీజనద్ దివశ్ చిత్రం న తన్యతుమ్ |
జ్యోతిర్ వైశ్వానరమ్ బృహత్ || 9-061-16
పవమానస్య తే రసో మదో రాజన్న్ అదుచ్ఛునః |
వి వారమ్ అవ్యమ్ అర్షతి || 9-061-17
పవమాన రసస్ తవ దక్షో వి రాజతి ద్యుమాన్ |
జ్యోతిర్ విశ్వం స్వర్ దృశే || 9-061-18
యస్ తే మదో వరేణ్యస్ తేనా పవస్వాన్ధసా |
దేవావీర్ అఘశంసహా || 9-061-19
జఘ్నిర్ వృత్రమ్ అమిత్రియం సస్నిర్ వాజం దివే-దివే |
గోషా ఉ అశ్వసా అసి || 9-061-20
సమ్మిశ్లో అరుషో భవ సూపస్థాభిర్ న ధేనుభిః |
సీదఞ్ ఛ్యేనో న యోనిమ్ ఆ || 9-061-21
స పవస్వ య ఆవిథేన్ద్రం వృత్రాయ హన్తవే |
వవ్రివాంసమ్ మహీర్ అపః || 9-061-22
సువీరాసో వయం ధనా జయేమ సోమ మీఢ్వః |
పునానో వర్ధ నో గిరః || 9-061-23
త్వోతాసస్ తవావసా స్యామ వన్వన్త ఆమురః |
సోమ వ్రతేషు జాగృహి || 9-061-24
అపఘ్నన్ పవతే మృధో ऽప సోమో అరావ్ణః |
గచ్ఛన్న్ ఇన్ద్రస్య నిష్కృతమ్ || 9-061-25
మహో నో రాయ ఆ భర పవమాన జహీ మృధః |
రాస్వేన్దో వీరవద్ యశః || 9-061-26
న త్వా శతం చన హ్రుతో రాధో దిత్సన్తమ్ ఆ మినన్ |
యత్ పునానో మఖస్యసే || 9-061-27
పవస్వేన్దో వృషా సుతః కృధీ నో యశసో జనే |
విశ్వా అప ద్విషో జహి || 9-061-28
అస్య తే సఖ్యే వయం తవేన్దో ద్యుమ్న ఉత్తమే |
సాసహ్యామ పృతన్యతః || 9-061-29
యా తే భీమాన్య్ ఆయుధా తిగ్మాని సన్తి ధూర్వణే |
రక్షా సమస్య నో నిదః || 9-061-30
