అభీ నవన్తే అద్రుహః ప్రియమ్ ఇన్ద్రస్య కామ్యమ్ |
వత్సం న పూర్వ ఆయుని జాతం రిహన్తి మాతరః || 9-100-01
పునాన ఇన్దవ్ ఆ భర సోమ ద్విబర్హసం రయిమ్ |
త్వం వసూని పుష్యసి విశ్వాని దాశుషో గృహే || 9-100-02
త్వం ధియమ్ మనోయుజం సృజా వృష్టిం న తన్యతుః |
త్వం వసూని పార్థివా దివ్యా చ సోమ పుష్యసి || 9-100-03
పరి తే జిగ్యుషో యథా ధారా సుతస్య ధావతి |
రంహమాణా వ్య్ అవ్యయం వారం వాజీవ సానసిః || 9-100-04
క్రత్వే దక్షాయ నః కవే పవస్వ సోమ ధారయా |
ఇన్ద్రాయ పాతవే సుతో మిత్రాయ వరుణాయ చ || 9-100-05
పవస్వ వాజసాతమః పవిత్రే ధారయా సుతః |
ఇన్ద్రాయ సోమ విష్ణవే దేవేభ్యో మధుమత్తమః || 9-100-06
త్వాం రిహన్తి మాతరో హరిమ్ పవిత్రే అద్రుహః |
వత్సం జాతం న ధేనవః పవమాన విధర్మణి || 9-100-07
పవమాన మహి శ్రవశ్ చిత్రేభిర్ యాసి రశ్మిభిః |
శర్ధన్ తమాంసి జిఘ్నసే విశ్వాని దాశుషో గృహే || 9-100-08
త్వం ద్యాం చ మహివ్రత పృథివీం చాతి జభ్రిషే |
ప్రతి ద్రాపిమ్ అముఞ్చథాః పవమాన మహిత్వనా || 9-100-09
