యజ్ఞస్య హి స్థ ఋత్విజా సస్నీ వాజేషు కర్మసు |
ఇన్ద్రాగ్నీ తస్య బోధతమ్ || 8-038-01
తోశాసా రథయావానా వృత్రహణాపరాజితా |
ఇన్ద్రాగ్నీ తస్య బోధతమ్ || 8-038-02
ఇదం వామ్ మదిరమ్ మధ్వ్ అధుక్షన్న్ అద్రిభిర్ నరః |
ఇన్ద్రాగ్నీ తస్య బోధతమ్ || 8-038-03
జుషేథాం యజ్ఞమ్ ఇష్టయే సుతం సోమం సధస్తుతీ |
ఇన్ద్రాగ్నీ ఆ గతం నరా || 8-038-04
ఇమా జుషేథాం సవనా యేభిర్ హవ్యాన్య్ ఊహథుః |
ఇన్ద్రాగ్నీ ఆ గతం నరా || 8-038-05
ఇమాం గాయత్రవర్తనిం జుషేథాం సుష్టుతిమ్ మమ |
ఇన్ద్రాగ్నీ ఆ గతం నరా || 8-038-06
ప్రాతర్యావభిర్ ఆ గతం దేవేభిర్ జేన్యావసూ |
ఇన్ద్రాగ్నీ సోమపీతయే || 8-038-07
శ్యావాశ్వస్య సున్వతో ऽత్రీణాం శృణుతం హవమ్ |
ఇన్ద్రాగ్నీ సోమపీతయే || 8-038-08
ఏవా వామ్ అహ్వ ఊతయే యథాహువన్త మేధిరాః |
ఇన్ద్రాగ్నీ సోమపీతయే || 8-038-09
ఆహం సరస్వతీవతోర్ ఇన్ద్రాగ్న్యోర్ అవో వృణే |
యాభ్యాం గాయత్రమ్ ఋచ్యతే || 8-038-10
