వయం ఘ త్వా సుతావన్త ఆపో న వృక్తబర్హిషః |
పవిత్రస్య ప్రస్రవణేషు వృత్రహన్ పరి స్తోతార ఆసతే || 8-033-01
స్వరన్తి త్వా సుతే నరో వసో నిరేక ఉక్థినః |
కదా సుతం తృషాణ ఓక ఆ గమ ఇన్ద్ర స్వబ్దీవ వంసగః || 8-033-02
కణ్వేభిర్ ధృష్ణవ్ ఆ ధృషద్ వాజం దర్షి సహస్రిణమ్ |
పిశఙ్గరూపమ్ మఘవన్ విచర్షణే మక్షూ గోమన్తమ్ ఈమహే || 8-033-03
పాహి గాయాన్ధసో మద ఇన్ద్రాయ మేధ్యాతిథే |
యః సమ్మిశ్లో హర్యోర్ యః సుతే సచా వజ్రీ రథో హిరణ్యయః || 8-033-04
యః సుషవ్యః సుదక్షిణ ఇనో యః సుక్రతుర్ గృణే |
య ఆకరః సహస్రా యః శతామఘ ఇన్ద్రో యః పూర్భిద్ ఆరితః || 8-033-05
యో ధృషితో యో ऽవృతో యో అస్తి శ్మశ్రుషు శ్రితః |
విభూతద్యుమ్నశ్ చ్యవనః పురుష్టుతః క్రత్వా గౌర్ ఇవ శాకినః || 8-033-06
క ఈం వేద సుతే సచా పిబన్తం కద్ వయో దధే |
అయం యః పురో విభినత్త్య్ ఓజసా మన్దానః శిప్ర్య్ అన్ధసః || 8-033-07
దానా మృగో న వారణః పురుత్రా చరథం దధే |
నకిష్ ట్వా ని యమద్ ఆ సుతే గమో మహాంశ్ చరస్య్ ఓజసా || 8-033-08
య ఉగ్రః సన్న్ అనిష్టృత స్థిరో రణాయ సంస్కృతః |
యది స్తోతుర్ మఘవా శృణవద్ ధవం నేన్ద్రో యోషత్య్ ఆ గమత్ || 8-033-09
సత్యమ్ ఇత్థా వృషేద్ అసి వృషజూతిర్ నో ऽవృతః |
వృషా హ్య్ ఉగ్ర శృణ్విషే పరావతి వృషో అర్వావతి శ్రుతః || 8-033-10
వృషణస్ తే అభీశవో వృషా కశా హిరణ్యయీ |
వృషా రథో మఘవన్ వృషణా హరీ వృషా త్వం శతక్రతో || 8-033-11
వృషా సోతా సునోతు తే వృషన్న్ ఋజీపిన్న్ ఆ భర |
వృషా దధన్వే వృషణం నదీష్వ్ ఆ తుభ్యం స్థాతర్ హరీణామ్ || 8-033-12
ఏన్ద్ర యాహి పీతయే మధు శవిష్ఠ సోమ్యమ్ |
నాయమ్ అచ్ఛా మఘవా శృణవద్ గిరో బ్రహ్మోక్థా చ సుక్రతుః || 8-033-13
వహన్తు త్వా రథేష్ఠామ్ ఆ హరయో రథయుజః |
తిరశ్ చిద్ అర్యం సవనాని వృత్రహన్న్ అన్యేషాం యా శతక్రతో || 8-033-14
అస్మాకమ్ అద్యాన్తమం స్తోమం ధిష్వ మహామహ |
అస్మాకం తే సవనా సన్తు శంతమా మదాయ ద్యుక్ష సోమపాః || 8-033-15
నహి షస్ తవ నో మమ శాస్త్రే అన్యస్య రణ్యతి |
యో అస్మాన్ వీర ఆనయత్ || 8-033-16
ఇన్ద్రశ్ చిద్ ఘా తద్ అబ్రవీత్ స్త్రియా అశాస్యమ్ మనః |
ఉతో అహ క్రతుం రఘుమ్ || 8-033-17
సప్తీ చిద్ ఘా మదచ్యుతా మిథునా వహతో రథమ్ |
ఏవేద్ ధూర్ వృష్ణ ఉత్తరా || 8-033-18
అధః పశ్యస్వ మోపరి సంతరామ్ పాదకౌ హర |
మా తే కశప్లకౌ దృశన్ స్త్రీ హి బ్రహ్మా బభూవిథ || 8-033-19
