ప్ర కృతాన్య్ ఋజీషిణః కణ్వా ఇన్ద్రస్య గాథయా |
మదే సోమస్య వోచత || 8-032-01
యః సృబిన్దమ్ అనర్శనిమ్ పిప్రుం దాసమ్ అహీశువమ్ |
వధీద్ ఉగ్రో రిణన్న్ అపః || 8-032-02
న్య్ అర్బుదస్య విష్టపం వర్ష్మాణమ్ బృహతస్ తిర |
కృషే తద్ ఇన్ద్ర పౌంస్యమ్ || 8-032-03
ప్రతి శ్రుతాయ వో ధృషత్ తూర్ణాశం న గిరేర్ అధి |
హువే సుశిప్రమ్ ఊతయే || 8-032-04
స గోర్ అశ్వస్య వి వ్రజమ్ మన్దానః సోమ్యేభ్యః |
పురం న శూర దర్షసి || 8-032-05
యది మే రారణః సుత ఉక్థే వా దధసే చనః |
ఆరాద్ ఉప స్వధా గహి || 8-032-06
వయం ఘా తే అపి ష్మసి స్తోతార ఇన్ద్ర గిర్వణః |
త్వం నో జిన్వ సోమపాః || 8-032-07
ఉత నః పితుమ్ ఆ భర సంరరాణో అవిక్షితమ్ |
మఘవన్ భూరి తే వసు || 8-032-08
ఉత నో గోమతస్ కృధి హిరణ్యవతో అశ్వినః |
ఇళాభిః సం రభేమహి || 8-032-09
బృబదుక్థం హవామహే సృప్రకరస్నమ్ ఊతయే |
సాధు కృణ్వన్తమ్ అవసే || 8-032-10
యః సంస్థే చిచ్ ఛతక్రతుర్ ఆద్ ఈం కృణోతి వృత్రహా |
జరితృభ్యః పురూవసుః || 8-032-11
స నః శక్రశ్ చిద్ ఆ శకద్ దానవాఅన్తరాభరః |
ఇన్ద్రో విశ్వాభిర్ ఊతిభిః || 8-032-12
యో రాయో ऽవనిర్ మహాన్ సుపారః సున్వతః సఖా |
తమ్ ఇన్ద్రమ్ అభి గాయత || 8-032-13
ఆయన్తారమ్ మహి స్థిరమ్ పృతనాసు శ్రవోజితమ్ |
భూరేర్ ఈశానమ్ ఓజసా || 8-032-14
నకిర్ అస్య శచీనాం నియన్తా సూనృతానామ్ |
నకిర్ వక్తా న దాద్ ఇతి || 8-032-15
న నూనమ్ బ్రహ్మణామ్ ఋణమ్ ప్రాశూనామ్ అస్తి సున్వతామ్ |
న సోమో అప్రతా పపే || 8-032-16
పన్య ఇద్ ఉప గాయత పన్య ఉక్థాని శంసత |
బ్రహ్మా కృణోత పన్య ఇత్ || 8-032-17
పన్య ఆ దర్దిరచ్ ఛతా సహస్రా వాజ్య్ అవృతః |
ఇన్ద్రో యో యజ్వనో వృధః || 8-032-18
వి షూ చర స్వధా అను కృష్టీనామ్ అన్వ్ ఆహువః |
ఇన్ద్ర పిబ సుతానామ్ || 8-032-19
పిబ స్వధైనవానామ్ ఉత యస్ తుగ్ర్యే సచా |
ఉతాయమ్ ఇన్ద్ర యస్ తవ || 8-032-20
అతీహి మన్యుషావిణం సుషువాంసమ్ ఉపారణే |
ఇమం రాతం సుతమ్ పిబ || 8-032-21
ఇహి తిస్రః పరావత ఇహి పఞ్చ జనాఅతి |
ధేనా ఇన్ద్రావచాకశత్ || 8-032-22
సూర్యో రశ్మిం యథా సృజా త్వా యచ్ఛన్తు మే గిరః |
నిమ్నమ్ ఆపో న సధ్ర్యక్ || 8-032-23
అధ్వర్యవ్ ఆ తు హి షిఞ్చ సోమం వీరాయ శిప్రిణే |
భరా సుతస్య పీతయే || 8-032-24
య ఉద్నః ఫలిగమ్ భినన్ న్యక్ సిన్ధూఅవాసృజత్ |
యో గోషు పక్వం ధారయత్ || 8-032-25
అహన్ వృత్రమ్ ఋచీషమ ఔర్ణవాభమ్ అహీశువమ్ |
హిమేనావిధ్యద్ అర్బుదమ్ || 8-032-26
ప్ర వ ఉగ్రాయ నిష్టురే ऽషాళ్హాయ ప్రసక్షిణే |
దేవత్తమ్ బ్రహ్మ గాయత || 8-032-27
యో విశ్వాన్య్ అభి వ్రతా సోమస్య మదే అన్ధసః |
ఇన్ద్రో దేవేషు చేతతి || 8-032-28
ఇహ త్యా సధమాద్యా హరీ హిరణ్యకేశ్యా |
వోళ్హామ్ అభి ప్రయో హితమ్ || 8-032-29
అర్వాఞ్చం త్వా పురుష్టుత ప్రియమేధస్తుతా హరీ |
సోమపేయాయ వక్షతః || 8-032-30
