ఉద్ ఉ బ్రహ్మాణ్య్ ఐరత శ్రవస్యేన్ద్రం సమర్యే మహయా వసిష్ఠ |
ఆ యో విశ్వాని శవసా తతానోపశ్రోతా మ ఈవతో వచాంసి || 7-023-01
అయామి ఘోష ఇన్ద్ర దేవజామిర్ ఇరజ్యన్త యచ్ ఛురుధో వివాచి |
నహి స్వమ్ ఆయుశ్ చికితే జనేషు తానీద్ అంహాంస్య్ అతి పర్ష్య్ అస్మాన్ || 7-023-02
యుజే రథం గవేషణం హరిభ్యామ్ ఉప బ్రహ్మాణి జుజుషాణమ్ అస్థుః |
వి బాధిష్ట స్య రోదసీ మహిత్వేన్ద్రో వృత్రాణ్య్ అప్రతీ జఘన్వాన్ || 7-023-03
ఆపశ్ చిత్ పిప్యు స్తర్యో న గావో నక్షన్న్ ఋతం జరితారస్ త ఇన్ద్ర |
యాహి వాయుర్ న నియుతో నో అచ్ఛా త్వం హి ధీభిర్ దయసే వి వాజాన్ || 7-023-04
తే త్వా మదా ఇన్ద్ర మాదయన్తు శుష్మిణం తువిరాధసం జరిత్రే |
ఏకో దేవత్రా దయసే హి మర్తాన్ అస్మిఞ్ ఛూర సవనే మాదయస్వ || 7-023-05
ఏవేద్ ఇన్ద్రం వృషణం వజ్రబాహుం వసిష్ఠాసో అభ్య్ అర్చన్త్య్ అర్కైః |
స న స్తుతో వీరవద్ ధాతు గోమద్ యూయమ్ పాత స్వస్తిభిః సదా నః || 7-023-06
