పిబా సోమమ్ ఇన్ద్ర మన్దతు త్వా యం తే సుషావ హర్యశ్వాద్రిః |
సోతుర్ బాహుభ్యాం సుయతో నార్వా || 7-022-01
యస్ తే మదో యుజ్యశ్ చారుర్ అస్తి యేన వృత్రాణి హర్యశ్వ హంసి |
స త్వామ్ ఇన్ద్ర ప్రభూవసో మమత్తు || 7-022-02
బోధా సు మే మఘవన్ వాచమ్ ఏమాం యాం తే వసిష్ఠో అర్చతి ప్రశస్తిమ్ |
ఇమా బ్రహ్మ సధమాదే జుషస్వ || 7-022-03
శ్రుధీ హవం విపిపానస్యాద్రేర్ బోధా విప్రస్యార్చతో మనీషామ్ |
కృష్వా దువాంస్య్ అన్తమా సచేమా || 7-022-04
న తే గిరో అపి మృష్యే తురస్య న సుష్టుతిమ్ అసుర్యస్య విద్వాన్ |
సదా తే నామ స్వయశో వివక్మి || 7-022-05
భూరి హి తే సవనా మానుషేషు భూరి మనీషీ హవతే త్వామ్ ఇత్ |
మారే అస్మన్ మఘవఞ్ జ్యోక్ కః || 7-022-06
తుభ్యేద్ ఇమా సవనా శూర విశ్వా తుభ్యమ్ బ్రహ్మాణి వర్ధనా కృణోమి |
త్వం నృభిర్ హవ్యో విశ్వధాసి || 7-022-07
నూ చిన్ ను తే మన్యమానస్య దస్మోద్ అశ్నువన్తి మహిమానమ్ ఉగ్ర |
న వీర్యమ్ ఇన్ద్ర తే న రాధః || 7-022-08
యే చ పూర్వ ఋషయో యే చ నూత్నా ఇన్ద్ర బ్రహ్మాణి జనయన్త విప్రాః |
అస్మే తే సన్తు సఖ్యా శివాని యూయమ్ పాత స్వస్తిభిః సదా నః || 7-022-09
