జుషస్వ నః సమిధమ్ అగ్నే అద్య శోచా బృహద్ యజతం ధూమమ్ ఋణ్వన్ |
ఉప స్పృశ దివ్యం సాను స్తూపైః సం రశ్మిభిస్ తతనః సూర్యస్య || 7-002-01
నరాశంసస్య మహిమానమ్ ఏషామ్ ఉప స్తోషామ యజతస్య యజ్ఞైః |
యే సుక్రతవః శుచయో ధియంధాః స్వదన్తి దేవా ఉభయాని హవ్యా || 7-002-02
ఈళేన్యం వో అసురం సుదక్షమ్ అన్తర్ దూతం రోదసీ సత్యవాచమ్ |
మనుష్వద్ అగ్నిమ్ మనునా సమిద్ధం సమ్ అధ్వరాయ సదమ్ ఇన్ మహేమ || 7-002-03
సపర్యవో భరమాణా అభిజ్ఞు ప్ర వృఞ్జతే నమసా బర్హిర్ అగ్నౌ |
ఆజుహ్వానా ఘృతపృష్ఠమ్ పృషద్వద్ అధ్వర్యవో హవిషా మర్జయధ్వమ్ || 7-002-04
స్వాధ్యో వి దురో దేవయన్తో ऽశిశ్రయూ రథయుర్ దేవతాతా |
పూర్వీ శిశుం న మాతరా రిహాణే సమ్ అగ్రువో న సమనేష్వ్ అఞ్జన్ || 7-002-05
ఉత యోషణే దివ్యే మహీ న ఉషాసానక్తా సుదుఘేవ ధేనుః |
బర్హిషదా పురుహూతే మఘోనీ ఆ యజ్ఞియే సువితాయ శ్రయేతామ్ || 7-002-06
విప్రా యజ్ఞేషు మానుషేషు కారూ మన్యే వాం జాతవేదసా యజధ్యై |
ఊర్ధ్వం నో అధ్వరం కృతం హవేషు తా దేవేషు వనథో వార్యాణి || 7-002-07
ఆ భారతీ భారతీభిః సజోషా ఇళా దేవైర్ మనుష్యేభిర్ అగ్నిః |
సరస్వతీ సారస్వతేభిర్ అర్వాక్ తిస్రో దేవీర్ బర్హిర్ ఏదం సదన్తు || 7-002-08
తన్ నస్ తురీపమ్ అధ పోషయిత్ను దేవ త్వష్టర్ వి రరాణః స్యస్వ |
యతో వీరః కర్మణ్యః సుదక్షో యుక్తగ్రావా జాయతే దేవకామః || 7-002-09
వనస్పతే ऽవ సృజోప దేవాన్ అగ్నిర్ హవిః శమితా సూదయాతి |
సేద్ ఉ హోతా సత్యతరో యజాతి యథా దేవానాం జనిమాని వేద || 7-002-10
ఆ యాహ్య్ అగ్నే సమిధానో అర్వాఙ్ ఇన్ద్రేణ దేవైః సరథం తురేభిః |
బర్హిర్ న ఆస్తామ్ అదితిః సుపుత్రా స్వాహా దేవా అమృతా మాదయన్తామ్ || 7-002-11
