క్షేత్రస్య పతినా వయం హితేనేవ జయామసి |
గామ్ అశ్వమ్ పోషయిత్న్వ్ ఆ స నో మృళాతీదృశే || 4-057-01
క్షేత్రస్య పతే మధుమన్తమ్ ఊర్మిం ధేనుర్ ఇవ పయో అస్మాసు ధుక్ష్వ |
మధుశ్చుతం ఘృతమ్ ఇవ సుపూతమ్ ఋతస్య నః పతయో మృళయన్తు || 4-057-02
మధుమతీర్ ఓషధీర్ ద్యావ ఆపో మధుమన్ నో భవత్వ్ అన్తరిక్షమ్ |
క్షేత్రస్య పతిర్ మధుమాన్ నో అస్త్వ్ అరిష్యన్తో అన్వ్ ఏనం చరేమ || 4-057-03
శునం వాహాః శునం నరః శునం కృషతు లాఙ్గలమ్ |
శునం వరత్రా బధ్యన్తాం శునమ్ అష్ట్రామ్ ఉద్ ఇఙ్గయ || 4-057-04
శునాసీరావ్ ఇమాం వాచం జుషేథాం యద్ దివి చక్రథుః పయః |
తేనేమామ్ ఉప సిఞ్చతమ్ || 4-057-05
అర్వాచీ సుభగే భవ సీతే వన్దామహే త్వా |
యథా నః సుభగాససి యథా నః సుఫలాససి || 4-057-06
ఇన్ద్రః సీతాం ని గృహ్ణాతు తామ్ పూషాను యచ్ఛతు |
సా నః పయస్వతీ దుహామ్ ఉత్తరామ్-ఉత్తరాం సమామ్ || 4-057-07
శునం నః ఫాలా వి కృషన్తు భూమిం శునం కీనాశా అభి యన్తు వాహైః |
శునమ్ పర్జన్యో మధునా పయోభిః శునాసీరా శునమ్ అస్మాసు ధత్తమ్ || 4-057-08
