మహీ ద్యావాపృథివీ ఇహ జ్యేష్ఠే రుచా భవతాం శుచయద్భిర్ అర్కైః |
యత్ సీం వరిష్ఠే బృహతీ విమిన్వన్ రువద్ ధోక్షా పప్రథానేభిర్ ఏవైః || 4-056-01
దేవీ దేవేభిర్ యజతే యజత్రైర్ అమినతీ తస్థతుర్ ఉక్షమాణే |
ఋతావరీ అద్రుహా దేవపుత్రే యజ్ఞస్య నేత్రీ శుచయద్భిర్ అర్కైః || 4-056-02
స ఇత్ స్వపా భువనేష్వ్ ఆస య ఇమే ద్యావాపృథివీ జజాన |
ఉర్వీ గభీరే రజసీ సుమేకే అవంశే ధీరః శచ్యా సమ్ ఐరత్ || 4-056-03
నూ రోదసీ బృహద్భిర్ నో వరూథైః పత్నీవద్భిర్ ఇషయన్తీ సజోషాః |
ఉరూచీ విశ్వే యజతే ని పాతం ధియా స్యామ రథ్యః సదాసాః || 4-056-04
ప్ర వామ్ మహి ద్యవీ అభ్య్ ఉపస్తుతిమ్ భరామహే |
శుచీ ఉప ప్రశస్తయే || 4-056-05
పునానే తన్వా మిథః స్వేన దక్షేణ రాజథః |
ఊహ్యాథే సనాద్ ఋతమ్ || 4-056-06
మహీ మిత్రస్య సాధథస్ తరన్తీ పిప్రతీ ఋతమ్ |
పరి యజ్ఞం ని షేదథుః || 4-056-07
