మరుతో యస్య హి క్షయే పాథా దివో విమహసః |
స సుగోపాతమో జనః || 1-086-01
యజ్ఞైర్ వా యజ్ఞవాహసో విప్రస్య వా మతీనామ్ |
మరుతః శృణుతా హవమ్ || 1-086-02
ఉత వా యస్య వాజినో ऽను విప్రమ్ అతక్షత |
స గన్తా గోమతి వ్రజే || 1-086-03
అస్య వీరస్య బర్హిషి సుతః సోమో దివిష్టిషు |
ఉక్థమ్ మదశ్ చ శస్యతే || 1-086-04
అస్య శ్రోషన్త్వ్ ఆ భువో విశ్వా యశ్ చర్షణీర్ అభి |
సూరం చిత్ సస్రుషీర్ ఇషః || 1-086-05
పూర్వీభిర్ హి దదాశిమ శరద్భిర్ మరుతో వయమ్ |
అవోభిశ్ చర్షణీనామ్ || 1-086-06
సుభగః స ప్రయజ్యవో మరుతో అస్తు మర్త్యః |
యస్య ప్రయాంసి పర్షథ || 1-086-07
శశమానస్య వా నరః స్వేదస్య సత్యశవసః |
విదా కామస్య వేనతః || 1-086-08
యూయం తత్ సత్యశవస ఆవిష్ కర్త మహిత్వనా |
విధ్యతా విద్యుతా రక్షః || 1-086-09
గూహతా గుహ్యం తమో వి యాత విశ్వమ్ అత్రిణమ్ |
జ్యోతిష్ కర్తా యద్ ఉశ్మసి || 1-086-10
