యత్ర గ్రావా పృథుబుధ్న ఊర్ధ్వో భవతి సోతవే |
ఉలూఖలసుతానామ్ అవేద్ వ్ ఇన్ద్ర జల్గులః || 1-028-01
యత్ర ద్వావ్ ఇవ జఘనాధిషవణ్యా కృతా |
ఉలూఖలసుతానామ్ అవేద్ వ్ ఇన్ద్ర జల్గులః || 1-028-02
యత్ర నార్య్ అపచ్యవమ్ ఉపచ్యవం చ శిక్షతే |
ఉలూఖలసుతానామ్ అవేద్ వ్ ఇన్ద్ర జల్గులః || 1-028-03
యత్ర మన్థాం విబధ్నతే రశ్మీన్ యమితవా ఇవ |
ఉలూఖలసుతానామ్ అవేద్ వ్ ఇన్ద్ర జల్గులః || 1-028-04
యచ్ చిద్ ధి త్వం గృహే-గృహ ఉలూఖలక యుజ్యసే |
ఇహ ద్యుమత్తమం వద జయతామ్ ఇవ దున్దుభిః || 1-028-05
ఉత స్మ తే వనస్పతే వాతో వి వాత్య్ అగ్రమ్ ఇత్ |
అథో ఇన్ద్రాయ పాతవే సును సోమమ్ ఉలూఖల || 1-028-06
ఆయజీ వాజసాతమా తా హ్య్ ఉచ్చా విజర్భృతః |
హరీ ఇవాన్ధాంసి బప్సతా || 1-028-07
తా నో అద్య వనస్పతీ ఋష్వావ్ ఋష్వేభిః సోతృభిః |
ఇన్ద్రాయ మధుమత్ సుతమ్ || 1-028-08
ఉచ్ ఛిష్టం చమ్వోర్ భర సోమమ్ పవిత్ర ఆ సృజ |
ని ధేహి గోర్ అధి త్వచి || 1-028-09
