అశ్వం న త్వా వారవన్తం వన్దధ్యా అగ్నిం నమోభిః |
సమ్రాజన్తమ్ అధ్వరాణామ్ || 1-027-01
స ఘా నః సూనుః శవసా పృథుప్రగామా సుశేవః |
మీఢ్వాఅస్మాకమ్ బభూయాత్ || 1-027-02
స నో దూరాచ్ చాసాచ్ చ ని మర్త్యాద్ అఘాయోః |
పాహి సదమ్ ఇద్ విశ్వాయుః || 1-027-03
ఇమమ్ ఊ షు త్వమ్ అస్మాకం సనిం గాయత్రం నవ్యాంసమ్ |
అగ్నే దేవేషు ప్ర వోచః || 1-027-04
ఆ నో భజ పరమేష్వ్ ఆ వాజేషు మధ్యమేషు |
శిక్షా వస్వో అన్తమస్య || 1-027-05
విభక్తాసి చిత్రభానో సిన్ధోర్ ఊర్మా ఉపాక ఆ |
సద్యో దాశుషే క్షరసి || 1-027-06
యమ్ అగ్నే పృత్సు మర్త్యమ్ అవా వాజేషు యం జునాః |
స యన్తా శశ్వతీర్ ఇషః || 1-027-07
నకిర్ అస్య సహన్త్య పర్యేతా కయస్య చిత్ |
వాజో అస్తి శ్రవాయ్యః || 1-027-08
స వాజం విశ్వచర్షణిర్ అర్వద్భిర్ అస్తు తరుతా |
విప్రేభిర్ అస్తు సనితా || 1-027-09
జరాబోధ తద్ వివిడ్ఢి విశే-విశే యజ్ఞియాయ |
స్తోమం రుద్రాయ దృశీకమ్ || 1-027-10
స నో మహాఅనిమానో ధూమకేతుః పురుశ్చన్ద్రః |
ధియే వాజాయ హిన్వతు || 1-027-11
స రేవాఇవ విశ్పతిర్ దైవ్యః కేతుః శృణోతు నః |
ఉక్థైర్ అగ్నిర్ బృహద్భానుః || 1-027-12
నమో మహద్భ్యో నమో అర్భకేభ్యో నమో యువభ్యో నమ ఆశినేభ్యః |
యజామ దేవాన్ యది శక్నవామ మా జ్యాయసః శంసమ్ ఆ వృక్షి దేవాః || 1-027-13
