వి హ్య్ అఖ్యమ్ మనసా వస్య ఇచ్ఛన్న్ ఇన్ద్రాగ్నీ జ్ఞాస ఉత వా సజాతాన్ |
నాన్యా యువత్ ప్రమతిర్ అస్తి మహ్యం స వాం ధియం వాజయన్తీమ్ అతక్షమ్ || 1-109-01
అశ్రవం హి భూరిదావత్తరా వాం విజామాతుర్ ఉత వా ఘా స్యాలాత్ |
అథా సోమస్య ప్రయతీ యువభ్యామ్ ఇన్ద్రాగ్నీ స్తోమం జనయామి నవ్యమ్ || 1-109-02
మా ఛేద్మ రశ్మీఇతి నాధమానాః పితౄణాం శక్తీర్ అనుయచ్ఛమానాః |
ఇన్ద్రాగ్నిభ్యాం కం వృషణో మదన్తి తా హ్య్ అద్రీ ధిషణాయా ఉపస్థే || 1-109-03
యువాభ్యాం దేవీ ధిషణా మదాయేన్ద్రాగ్నీ సోమమ్ ఉశతీ సునోతి |
తావ్ అశ్వినా భద్రహస్తా సుపాణీ ఆ ధావతమ్ మధునా పృఙ్క్తమ్ అప్సు || 1-109-04
యువామ్ ఇన్ద్రాగ్నీ వసునో విభాగే తవస్తమా శుశ్రవ వృత్రహత్యే |
తావ్ ఆసద్యా బర్హిషి యజ్ఞే అస్మిన్ ప్ర చర్షణీ మాదయేథాం సుతస్య || 1-109-05
ప్ర చర్షణిభ్యః పృతనాహవేషు ప్ర పృథివ్యా రిరిచాథే దివశ్ చ |
ప్ర సిన్ధుభ్యః ప్ర గిరిభ్యో మహిత్వా ప్రేన్ద్రాగ్నీ విశ్వా భువనాత్య్ అన్యా || 1-109-06
ఆ భరతం శిక్షతం వజ్రబాహూ అస్మాఇన్ద్రాగ్నీ అవతం శచీభిః |
ఇమే ను తే రశ్మయః సూర్యస్య యేభిః సపిత్వమ్ పితరో న ఆసన్ || 1-109-07
పురందరా శిక్షతం వజ్రహస్తాస్మాఇన్ద్రాగ్నీ అవతమ్ భరేషు |
తన్ నో మిత్రో వరుణో మామహన్తామ్ అదితిః సిన్ధుః పృథివీ ఉత ద్యౌః || 1-109-08
