నమో మిత్రస్య వరుణస్య చక్షసే మహో దేవాయ తద్ ఋతం సపర్యత |
దూరేదృశే దేవజాతాయ కేతవే దివస్ పుత్రాయ సూర్యాయ శంసత || 10-037-01
సా మా సత్యోక్తిః పరి పాతు విశ్వతో ద్యావా చ యత్ర తతనన్న్ అహాని చ |
విశ్వమ్ అన్యన్ ని విశతే యద్ ఏజతి విశ్వాహాపో విశ్వాహోద్ ఏతి సూర్యః || 10-037-02
న తే అదేవః ప్రదివో ని వాసతే యద్ ఏతశేభిః పతరై రథర్యసి |
ప్రాచీనమ్ అన్యద్ అను వర్తతే రజ ఉద్ అన్యేన జ్యోతిషా యాసి సూర్య || 10-037-03
యేన సూర్య జ్యోతిషా బాధసే తమో జగచ్ చ విశ్వమ్ ఉదియర్షి భానునా |
తేనాస్మద్ విశ్వామ్ అనిరామ్ అనాహుతిమ్ అపామీవామ్ అప దుష్వప్న్యం సువ || 10-037-04
విశ్వస్య హి ప్రేషితో రక్షసి వ్రతమ్ అహేళయన్న్ ఉచ్చరసి స్వధా అను |
యద్ అద్య త్వా సూర్యోపబ్రవామహై తం నో దేవా అను మంసీరత క్రతుమ్ || 10-037-05
తం నో ద్యావాపృథివీ తన్ న ఆప ఇన్ద్రః శృణ్వన్తు మరుతో హవం వచః |
మా శూనే భూమ సూర్యస్య సందృశి భద్రం జీవన్తో జరణామ్ అశీమహి || 10-037-06
విశ్వాహా త్వా సుమనసః సుచక్షసః ప్రజావన్తో అనమీవా అనాగసః |
ఉద్యన్తం త్వా మిత్రమహో దివే-దివే జ్యోగ్ జీవాః ప్రతి పశ్యేమ సూర్య || 10-037-07
మహి జ్యోతిర్ బిభ్రతం త్వా విచక్షణ భాస్వన్తం చక్షుషే-చక్షుషే మయః |
ఆరోహన్తమ్ బృహతః పాజసస్ పరి వయం జీవాః ప్రతి పశ్యేమ సూర్య || 10-037-08
యస్య తే విశ్వా భువనాని కేతునా ప్ర చేరతే ని చ విశన్తే అక్తుభిః |
అనాగాస్త్వేన హరికేశ సూర్యాహ్నాహ్నా నో వస్యసా-వస్యసోద్ ఇహి || 10-037-09
శం నో భవ చక్షసా శం నో అహ్నా శమ్ భానునా శం హిమా శం ఘృణేన |
యథా శమ్ అధ్వఞ్ ఛమ్ అసద్ దురోణే తత్ సూర్య ద్రవిణం ధేహి చిత్రమ్ || 10-037-10
అస్మాకం దేవా ఉభయాయ జన్మనే శర్మ యచ్ఛత ద్విపదే చతుష్పదే |
అదత్ పిబద్ ఊర్జయమానమ్ ఆశితం తద్ అస్మే శం యోర్ అరపో దధాతన || 10-037-11
యద్ వో దేవాశ్ చకృమ జిహ్వయా గురు మనసో వా ప్రయుతీ దేవహేళనమ్ |
అరావా యో నో అభి దుచ్ఛునాయతే తస్మిన్ తద్ ఏనో వసవో ని ధేతన || 10-037-12
