భద్రం నో అపి వాతయ మనో దక్షమ్ ఉత క్రతుమ్ |
అధా తే సఖ్యే అన్ధసో వి వో మదే రణన్ గావో న యవసే వివక్షసే || 10-025-01
హృదిస్పృశస్ త ఆసతే విశ్వేషు సోమ ధామసు |
అధా కామా ఇమే మమ వి వో మదే వి తిష్ఠన్తే వసూయవో వివక్షసే || 10-025-02
ఉత వ్రతాని సోమ తే ప్రాహమ్ మినామి పాక్యా |
అధా పితేవ సూనవే వి వో మదే మృళా నో అభి చిద్ వధాద్ వివక్షసే || 10-025-03
సమ్ ఉ ప్ర యన్తి ధీతయః సర్గాసో ऽవతాఇవ |
క్రతుం నః సోమ జీవసే వి వో మదే ధారయా చమసాఇవ వివక్షసే || 10-025-04
తవ త్యే సోమ శక్తిభిర్ నికామాసో వ్య్ ఋణ్విరే |
గృత్సస్య ధీరాస్ తవసో వి వో మదే వ్రజం గోమన్తమ్ అశ్వినం వివక్షసే || 10-025-05
పశుం నః సోమ రక్షసి పురుత్రా విష్ఠితం జగత్ |
సమాకృణోషి జీవసే వి వో మదే విశ్వా సమ్పశ్యన్ భువనా వివక్షసే || 10-025-06
త్వం నః సోమ విశ్వతో గోపా అదాభ్యో భవ |
సేధ రాజన్న్ అప స్రిధో వి వో మదే మా నో దుఃశంస ఈశతా వివక్షసే || 10-025-07
త్వం నః సోమ సుక్రతుర్ వయోధేయాయ జాగృహి |
క్షేత్రవిత్తరో మనుషో వి వో మదే ద్రుహో నః పాహ్య్ అంహసో వివక్షసే || 10-025-08
త్వం నో వృత్రహన్తమేన్ద్రస్యేన్దో శివః సఖా |
యత్ సీం హవన్తే సమిథే వి వో మదే యుధ్యమానాస్ తోకసాతౌ వివక్షసే || 10-025-09
అయం ఘ స తురో మద ఇన్ద్రస్య వర్ధత ప్రియః |
అయం కక్షీవతో మహో వి వో మదే మతిం విప్రస్య వర్ధయద్ వివక్షసే || 10-025-10
అయం విప్రాయ దాశుషే వాజాఇయర్తి గోమతః |
అయం సప్తభ్య ఆ వరం వి వో మదే ప్రాన్ధం శ్రోణం చ తారిషద్ వివక్షసే || 10-025-11
