ఇక్ష్వాకుకులతిలక
కాంభోజి రాగం త్రిపుట తాళం
ప: ఇక్ష్వాకు కుల తిలక యికనైన పలుకవె రామచంద్రా నన్ను
రక్షింప కున్నను రక్షకు లెవరింక రామచంద్రా || ఇక్ష్వాకు ||
చ1: చుట్టు ప్రాకారములు సొంపుగచేయిస్తి రామచంద్రా
ఆ ప్రాకారమునకు పట్టె పదివేల వరహాలు రామచంద్రా || ఇక్ష్వాకు ||
చ2: గోపుర మంటపాలు కుదురుగ కట్టిస్తి రామచంద్రా నను
క్రొత్తగ చూడక నిత్తరి బ్రోవుము రామచంద్రా || ఇక్ష్వాకు ||
చ3: భరతునకు చేసితి పచ్చల పతకము రామచంద్రా
ఆ పతకమునకు పట్టె పదివేల వరహాలు రామచంద్రా || ఇక్ష్వాకు ||
చ4: శత్రుఘ్నునకు నేను చేసితి మొలత్రాడు రామచంద్రా
ఆ మొలత్రాడునకు పట్టె మొహరీలు పదివేలు రామచంద్రా || ఇక్ష్వాకు ||
చ5: లక్ష్మణునకు చేసితి ముత్యాల పతకము రామచంద్రా
ఆ పతకమునకు పట్టె పదివేల వరహాలు రామచంద్రా || ఇక్ష్వాకు ||
చ6: సీతమ్మకు చేయిస్తి చింతాకు పతకము రామచంద్రా
ఆ పతకమునకు పట్టె పదివేల వరహాలు రామచంద్రా || ఇక్ష్వాకు ||
చ7: వాహనములు మీకు వరుసతో చేసితి రామచంద్రా జగ
న్మోహన సంకెళ్ళు వేసిరి కాళ్ళకు రామచంద్రా || ఇక్ష్వాకు ||
చ8: కలికి తురాయి నీకు పొలుపుగ చేసితి రామచంద్రా
నీవు కులుకుచు తిరిగెద వెవరబ్బ సొమ్మని రామచంద్రా || ఇక్ష్వాకు ||
చ9: మీ తండ్రి దశరథ మహారాజు మెట్టెనా రామచంద్రా
లేక మీ మామ జనక మహారాజు పంపెనా రామచంద్రా || ఇక్ష్వాకు ||
చ10: అబ్బా తిట్టితినని ఆయాసపడవద్దు రామచంద్రా
ఈ దెబ్బల కోర్వక అబ్బ తిట్టితినయ్య రామచంద్రా || ఇక్ష్వాకు ||
చ11: సర్కారు పైకము తృణముగ నెంచకు రామచంద్రా
దెబ్బల కోర్వను అప్పుతీర్పుమయ్య రామచంద్రా || ఇక్ష్వాకు ||
చ12: ఏటికి చల్లిన నీళ్ళాయె నా బ్రతుకు రామచంద్రా
నేను అధములందరికంటె అన్యాయమైతిని రామచంద్రా || ఇక్ష్వాకు ||
చ13: కౌసల్య పుత్రుడు దశరధ తనయుడు రామచంద్రా
కావు క్షేమముగ భద్రాద్రి నెలకొన్న శ్రీ రామచంద్రా || ఇక్ష్వాకు ||
చ14: భక్తులందరిని పరిపాలించెడి శ్రీరామచంద్రా
నీవు క్షేమముగ రామదాసుని నేలుము || ఇక్ష్వాకు ||
This work was published before January 1, 1929, and is in the public domain worldwide because the author died at least 100 years ago.