6. షష్ట్యంతములు

ఉ. హారికి నందగోకుల విహారికిఁ జక్రసమీర దైత్య సం

హారికి భక్త దు:ఖ పరిహారికి గోపనితంబినీ మనో

హారికి దుష్టసంపదపహారికి ఘోషకుటీ పయో ఘృతా

హారికి బాలకగ్రహ మహాసుర దుర్వనితా ప్రహారికిన్. (1-27)

ఉ. శీలికి నీతిశాలికి వశీకృతశూలికి బాణహస్త ని

ర్మూలికి ఘోరనీరద విముక్త శిలాహత గోపగోపికా

పాలికి వర్ణధర్మపరిపాలికి నర్జున భూజయుగ్మ సం

చాలికి మాలికిన్ విపుల చక్రనిరుద్ధ మరీచిమాలికిన్. (1-28)

ఉ. క్షంతకుఁ గాళియోరగ విశాల ఫణోపరి నర్తనక్రియా

రంతకు నుల్లసన్మగధరాజ చతుర్విధ ఘోర వాహినీ

హంతకు నింద్రనందన నియంతకు సర్వచరాచరావళీ

మంతకు నిర్జితేంద్రియ సమంచిత భక్తజనానుగంతకున్. (1-29)

ఉ. న్యాయికి భూసురేంద్ర మృతనందనదాయికి రుక్మిణీ మన:

స్థాయికి భూతసమ్మద విధాయికి సాధు జనానురాగ సం

ధాయికిఁ బీతవస్త్ర పరిధాయికిఁ బద్మభవాండ భాండ ని

ర్మాయికి గోపికా నివహ మందిరయాయికి శేషశాయికిన్. (1-30)

వ. సమర్పితంబుగా నే నాంధ్రభాషను రచియింపఁబూనిన శ్రీమహాభాగవతంబునకుం బ్రారంభం బెట్టిదనిన, (1-31)