సుందరకాండము - సర్గము 12

సర్గ – 12

స తస్య మధ్యే భవనస్య మారుతిః| లతా గృహాంశ్చిత్ర గ్తృహాన్నిశా గృహాన్ | జగామ సీతాం ప్రతి దర్శనోత్సుకో | న చైవ తాం పశ్యతి చారు దర్శనామ్ || 5.12.1

స చిన్తయామాస తతో మహాకపిః | ప్రియామపశ్యన్ రఘునన్దనస్య తామ్ | ధ్రువం హి సీతా మ్రియతే యథా న మే | విచిన్వతో దర్శనమేతి మైథిలీ || 5.12.2

సా రాక్షసానాం ప్రవరేణ జానకి| స్వ శీల సంరక్షణ తత్పరా సతీ | అనేన నూనం ప్రతిదుష్ట కర్మణా | హతా భవేదార్య పథే పరే స్థితా || 5.12.3

విరూప రూపా వికృతా వివర్చసో | మహాననా దీర్ఘ విరూప దర్శనాః | సమీక్ష్య సా రాక్షస రాజ యోషితో | భయాద్వినష్టా జనకేశ్వరాత్మజా|| 5.12.4

సీతామదృష్ట్వా హ్యనవాప్య పౌరుషం | విహృత్య కాలం సహ వానరైశ్చిరమ్ | న మే స్తి సుగ్రీవ సమీపగా గతిః | సుతీక్ష్ణ దణ్డో బలవాంశ్చ వానరః || 5.12.5

దృష్టమన్తఃపురం సర్వం దృష్టా రావణ యోషితః | న సీతా దృశ్యతే సాధ్వీ వృథా జాతో మమ శ్రమః || 5.12.6

కిం ను మాం వానరాః సర్వే గతం వక్ష్యన్తి సఞ్గతాః | గత్వా తత్ర త్వయా వీర కిం కృతం తద్వదస్వ నః || 5.12.7

అదృష్ట్వా కిం ప్రవక్ష్యామి తామహం జనకాత్మజామ్ | ధ్రువం ప్రాయముపైష్యన్తి కాలస్య వ్యతివర్తనే || 5.12.8

కిం వా వక్ష్యతి వృద్ధశ్చ జామ్బవానాఞ్గదశ్చ సః | గతం పారం సముద్రస్య వానరాశ్చ సమాగతాః || 5.12.9

అనిర్వేదః శ్రియో మూలమనిర్వేదః పరం సుఖమ్ | అనిర్వేదో హి సతతం సర్వార్థేషు ప్రవర్తకః || 5.12.10

కరోతి సఫలం జన్తోః కర్మ యత్తత్కరోతి సః | తస్మాదనిర్వేద కృతం యత్నం చేష్టే హముత్తమమ్ || 5.12.11

అదృష్టాంశ్చ విచేశ్యామి దేశాన్ రావణ పాలితాన్ | ఆపాన శాలా విచితాస్తథా పుష్ప గృహాణి చ || 5.12.12

చిత్ర శాలాశ్చ విచితా భూయః క్రీడాగృహాణి చ | నిష్కుటాన్తర రథ్యాశ్చ విమానాని చ సర్వశః || 5.12.13

ఇతి సఙ్చిన్త్య భూయో పి విచేతుముపచక్రమే | భూమీ గృహాంశ్చైత్య గృహాన్ గృహాతిగృహకానపి || 5.12.14

ఉత్పతన్నిష్పతంశ్చాపి తిష్ఠన్గచ్ఛన్ పునః పునః| అపావృణ్వంశ్చ ద్వారాణి కపాటాన్యవఘాటయన్ || 5.12.15

ప్రవిశన్నిశ్పతంశ్చాపి ప్రపతన్నుత్పతన్నపి | సర్వమప్యవకాశం స విచచార మహాకపిః || 5.12.16

చతురఞ్గుల మాత్రో పి నావకాశః స విద్యతే | రావణాన్తఃపురే తస్మిన్ యం కపిర్న జగామ సః || 5.12.17

ప్రాకరాన్తర రథ్యాశ్చ వేదికాశ్చైత్య సంశ్రయాః | దీర్ఘికాః పుష్కరిణ్యశ్చ సర్వం తేనావలోకితమ్ || 5.12.18

రాక్షస్యో వివిధాకారా విరూపా వికృతాస్తథా | దృష్టా హనూమతా తత్ర న తు సా జనకాత్మజా || 5.12.19

రూపేణాప్రతిమా లోకే వరా విద్యాధర స్త్రియః | దృష్టా హనూమతా తత్ర న తు రాఘవ నన్దినీ || 5.12.20

నాగ కన్యా వరారోహాః పూర్ణ చన్ద్ర నిభాననాః | దృష్టా హనూమతా తత్ర న తు సీతా సుమధ్యమా || 5.12.21

ప్రమథ్య రాక్షసేన్ద్రేణ నాగ కన్యా బలాద్ధృతాః | దృష్టా హనూమతా తత్ర న సా జనక నన్దినీ || 5.12.22

సో పశ్యంస్తాం మహా బాహుః పశ్యంశ్చాన్యా వర స్త్రియః | విశసాద ముహుర్ధీమాన్ హనూమాన్ మారుతాత్మజః || 5.12.23

ఉద్యోగం వానరేన్ద్రాణం ప్లవనం సాగరస్య చ | వ్యర్థం వీక్ష్యానిల సుతశ్చిన్తాం పునరుపాగమత్ || 5.12.24

అవతీర్య విమానాచ్చ హనూమాన్ మారుతాత్మజః | చిన్తాముపజగామాథ శోకోపహత చేతనః || 5.12.25

ఇత్యార్షే శ్రీమద్రామాయణే వాల్మీకీయ ఆదికావ్యే సున్దరకాణ్డే ద్వాదశస్సర్గః |