సామవేదము - ఉత్తర ఆర్చికః - ప్రథమ ప్రపాఠకః - ప్రథమోऽర్ధః

←ముందరి అధ్యాయము

సామవేదము (సామవేదము - ఉత్తర ఆర్చికః - ప్రథమ ప్రపాఠకః - ప్రథమోऽర్ధః)

తరువాతి అధ్యాయము→

ఉత్తర ఆర్చికః - ప్రథమ ప్రపాఠకః - ప్రథమోऽర్ధః - సూక్తము 1

ఉపాస్మై గాయతా నరః పవమానాయేన్దవే|
అభి దేవాఁ ఇయక్షతే||

అభి తే మధునా పయోऽథర్వాణో అశిశ్రయుః|
దేవం దేవాయ దేవయు||

స నః పవస్వ శం గవే శం జనాయ శమర్వతే|
శఁ రాజన్నోషధీభ్యః||

ఉత్తర ఆర్చికః - ప్రథమ ప్రపాఠకః - ప్రథమోऽర్ధః - సూక్తము 2

దవిద్యుతత్యా రుచా పరిష్టోభన్త్యా కృపా|
సోమాః శుక్రా గవాశిరః||

హిన్వానో హేతృభిర్హిత ఆ వాజం వాజ్యక్రమీత్|
సీదన్తో వనుషో యథా||

ఋధక్సోమ స్వస్తయే సంజగ్మానో దివా కవే|
పవస్వ సూర్యో దృశే||

ఉత్తర ఆర్చికః - ప్రథమ ప్రపాఠకః - ప్రథమోऽర్ధః - సూక్తము 3

పవమానస్య తే కవే వాజిన్త్సర్గా అసృక్షతే|
అర్వన్తో న శ్రవస్యవః||

అచ్ఛా కోశం మధుశ్చుతమసృగ్రం వారే అవ్యయే|
అవావశన్త ధీతయః||

అచ్ఛా సముద్రమిన్దవోऽస్తం గావో న ధేనవః|
అగ్మన్నృతస్య యోనిమా||

ఉత్తర ఆర్చికః - ప్రథమ ప్రపాఠకః - ప్రథమోऽర్ధః - సూక్తము 4

అగ్న ఆ యాహి వీతయే గృణానో హవ్యదాతయే|
ని హోతా సత్సి బర్హిషి||

తం త్వా సమిద్భిరఙ్గిరో ఘృతేన వర్ధయామసి|
బృహచ్ఛోచా యవిష్ఠ్య||

స నః పృథు శ్రవాయ్యమచ్ఛా దేవ వివాససి|
బృహదగ్నే సువీర్యమ్||

ఉత్తర ఆర్చికః - ప్రథమ ప్రపాఠకః - ప్రథమోऽర్ధః - సూక్తము 5

ఆ నో మిత్రావరుణా ఘృతైర్గవ్యూతిముక్షతమ్|
మధ్వా రజాఁసి సుక్రతూ||

ఉరుశఁసా నమోవృధా మహ్నా దక్షస్య రాజథః|
ద్రాఘిష్ఠాభిః శుచివ్రతా||

గృణానా జమదగ్నినా యోనావృతస్య సీదతమ్|
పాతఁ సోమమృతావృధా||

ఉత్తర ఆర్చికః - ప్రథమ ప్రపాఠకః - ప్రథమోऽర్ధః - సూక్తము 6

ఆ యాహి సుషుమా హి త ఇన్ద్ర సోమం పిబా ఇమమ్|
ఏదం బర్హిః సదో మమ||

ఆ త్వా బ్రహ్మయుజా హరీ వహతామిన్ద్ర కేశినా|
ఉప బ్రహ్మాణి నః శృణు||

బ్రహ్మాణస్త్వా యుజా వయఁ సోమపామిన్ద్ర సోమినః|
సుతావన్తో హవామహే||

ఉత్తర ఆర్చికః - ప్రథమ ప్రపాఠకః - ప్రథమోऽర్ధః - సూక్తము 7

ఇన్ద్రాగ్నీ ఆ గతఁ సుతం గీర్భిర్నభో వరేణ్యమ్|
అస్య పాతం ధియేషితా||

ఇన్ద్రాగ్నీ జరితుః సచా యజ్ఞో జిగాతి చేతనః|
అయా పాతమిమఁ సుతమ్||

ఇన్ద్రమగ్నిం కవిచ్ఛదా యజ్ఞస్య జూత్యా వృణే|
తా సోమస్యేహ తృమ్పతామ్||

ఉత్తర ఆర్చికః - ప్రథమ ప్రపాఠకః - ప్రథమోऽర్ధః - సూక్తము 8

ఉచ్చా తే జాతమన్ధసో దివి సద్భూమ్యా దదే|
ఉగ్రఁ శర్మ మహి శ్రవః||

స న ఇన్ద్రాయ యజ్యవే వరుణాయ మరుద్భ్యః|
వరివోవిత్పరి స్రవ||

ఏనా విశ్వాన్యర్య ఆ ద్యుమ్నాని మానుషాణామ్|
సిషాసన్తో వనామహే||

ఉత్తర ఆర్చికః - ప్రథమ ప్రపాఠకః - ప్రథమోऽర్ధః - సూక్తము 9

పునానః సోమ ధారయాపో వసానో అర్షసి|
ఆ రత్నధా యోనిమృతస్య సీదస్యుత్సో దేవో హిరణ్యయః||

దుహాన ఊధర్దివ్యం మధు ప్రియం ప్రత్నఁ సధస్థమాసదత్|
ఆపృచ్ఛ్యం ధరుణం వాజ్యర్షసి నృభిర్ధౌతో విచక్షణః||

ఉత్తర ఆర్చికః - ప్రథమ ప్రపాఠకః - ప్రథమోऽర్ధః - సూక్తము 10

ప్ర తు ద్రవ పరి కోశం ని షీద నృభిః పునానో అభి వాజమర్ష|
అశ్వం న త్వా వాజినం మర్జయన్తోऽచ్ఛా బర్హీ రశనాభిర్నయన్తి||

స్వాయుధః పవతే దేవ ఇన్దురశస్తిహా వృజనా రక్షమాణః|
పితా దేవానాం జనితా సుదక్షో విష్టమ్భో దివో ధరుణః పృథివ్యాః||

ఋషిర్విప్రః పురతా జనానామృభుర్ధీర ఉశనా కావ్యేన|
స చిద్వివేద నిహితం యదాసామపీచ్యాం గుహ్యం నామ గోనామ్||

ఉత్తర ఆర్చికః - ప్రథమ ప్రపాఠకః - ప్రథమోऽర్ధః - సూక్తము 11

అభి త్వా శూర నోనుమోऽదుగ్ధా ఇవ ధేనవః|
ఈశానమస్య జగతః స్వర్దృశమీశానమిన్ద్ర తస్థుషః||

న త్వావాఁ అన్యో దివ్యో న పార్థివో న జాతో న జనిష్యతే|
అశ్వాయన్తో మఘవన్నిన్ద్ర వాజినో గవ్యన్తస్త్వా హవామహే||

ఉత్తర ఆర్చికః - ప్రథమ ప్రపాఠకః - ప్రథమోऽర్ధః - సూక్తము 12

కయా నశ్చిత్ర ఆ భువదూతీ సదావృధః సఖా|
కయా శచిష్ఠయా వృతా||

కస్త్వా సత్యో మదానాం మఁహిష్ఠో మత్సదన్ధసః|
దృఢా చిదారుజే వసు||

అభీ షు ణః సఖీనామవితా జరితౄణామ్|
శతం భవాస్యూతయే||

ఉత్తర ఆర్చికః - ప్రథమ ప్రపాఠకః - ప్రథమోऽర్ధః - సూక్తము 13

తం వో దస్మమృతీషహం వసోర్మన్దానమన్ధసః|
అభి వత్సం న స్వసరేషు ధేనవ ఇన్ద్రం గీర్భిర్నవామహే||

ద్యుక్షఁ సుదానుం తవిషీభిరావృతం గిరిం న పురుభోజసమ్|
క్షుమన్తం వాజఁ శతినఁ సహస్రిణం మక్షూ గోమన్తమీమహే||

ఉత్తర ఆర్చికః - ప్రథమ ప్రపాఠకః - ప్రథమోऽర్ధః - సూక్తము 14

తరోభిర్వో విదద్వసుమిన్ద్రఁ సబాధ ఊతయే|
బృహద్గాయన్తః సుతసోమే అధ్వరే హువే భరం న కారిణమ్||

న యం దుధ్రా వరన్తే న స్థిరా మురో మదేషు శిప్రమన్ధసః|
య ఆదృత్యా శశమానాయ సున్వతే దాతా జరిత్ర ఉక్థ్యమ్||

ఉత్తర ఆర్చికః - ప్రథమ ప్రపాఠకః - ప్రథమోऽర్ధః - సూక్తము 15

స్వాదిష్ఠయా మదిష్ఠయా పవస్వ సోమ ధారయా|
ఇన్ద్రాయ పాతవే సుతః||

రక్షోహా విశ్వచర్షణిరభి యోనిమయోహతే|
ద్రోణే సధస్థమాసదత్||

వరివోధాతమో భువో మఁహిష్ఠో వృత్రహన్తమః|
పర్షి రాధో మఘోనామ్||

ఉత్తర ఆర్చికః - ప్రథమ ప్రపాఠకః - ప్రథమోऽర్ధః - సూక్తము 16

పవస్వ మధుమత్తమ ఇన్ద్రాయ సోమ క్రతువిత్తమో మదః|
మహి ద్యుక్షతమో మదః||

యస్య తే పీత్వా వృషభో వృషాయతేऽస్య పీత్వా స్వర్విదః|
స సుప్రకేతో అభ్యక్రమీదిషోऽచ్ఛా వాజం నైతశః||

ఉత్తర ఆర్చికః - ప్రథమ ప్రపాఠకః - ప్రథమోऽర్ధః - సూక్తము 17

ఇన్ద్రమచ్ఛ సుతా ఇమే వృషణం యన్తు హరయః|
శ్రుష్టే జాతాస ఇన్దవః స్వర్విదః||

అయం భరాయ సానసిరిన్ద్రాయ పవతే సుతః|
సోమో జైత్రస్య చేతతి యథా విదే||

అస్యేదిన్ద్రో మదేష్వా గ్రాభం గృభ్ణాతి సానసిమ్|
వజ్రం చ వృషణం భరత్సమప్సుజిత్||

ఉత్తర ఆర్చికః - ప్రథమ ప్రపాఠకః - ప్రథమోऽర్ధః - సూక్తము 18

పురోజితీ వో అన్ధసః సుతాయ మాదయిత్నవే|
అప శ్వానఁ శ్నథిష్టన సఖాయో దీర్ఘజిహ్వ్యమ్||

యో ధారయా పావకయా పరిప్రస్యన్దతే సుతః|
ఇన్దురశ్వో న కృత్వ్యః||

తం దురోషమభీ నరః సోమం విశ్వాచ్యా ధియా|
యజ్ఞాయ సన్త్వద్రయః||

ఉత్తర ఆర్చికః - ప్రథమ ప్రపాఠకః - ప్రథమోऽర్ధః - సూక్తము 19

అభి ప్రియాణి పవతే చనోహితో నామాని యహ్వో అధి యేషు వర్ధతే|
ఆ సూర్యస్య బృహతో బృహన్నధి రథం విష్వఞ్చమరుహద్విచక్షణః||

ఋతస్య జిహ్వా పవతే మధు ప్రియం వక్తా పతిర్ధియో అస్యా అదాభ్యః|
దధాతి పుత్రః పిత్రోరపీచ్యాం నామ తృతీయమధి రోచనం దివః||

అవ ద్యుతానః కలశాఁ అచిక్రదన్నృభిర్యేమాణః కోశ ఆ హిరణ్యయే|
అభీ ఋతస్య దోహనా అనూషతాధి త్రిపృష్ఠ ఉషసో వి రాజసి||

ఉత్తర ఆర్చికః - ప్రథమ ప్రపాఠకః - ప్రథమోऽర్ధః - సూక్తము 20

యజ్ఞాయజ్ఞా వో అగ్నయే గిరాగిరా చ దక్షసే|
ప్రప్ర వయమమృతం జాతవేదసం ప్రియం మిత్రం న శఁసిషమ్||

ఊర్జో నపాతఁ స హినాయమస్మయుర్దాశేమ హవ్యదాతయే|
భువద్వాజేష్వవితా భువద్వృధ ఉత త్రాతా తనూనామ్||

ఉత్తర ఆర్చికః - ప్రథమ ప్రపాఠకః - ప్రథమోऽర్ధః - సూక్తము 21

ఏహ్యూ షు బ్రవాణి తేऽగ్న ఇత్థేతరా గిరః|
ఏభిర్వర్ధాస ఇన్దుభిః||

యత్ర క్వ చ తే మనో దక్షం దధస ఉత్తరమ్|
తత్రా యోనిం కృణవసే||

న హి తే పూర్తమక్షిపద్భువన్నేమానాం పతే|
అథా దువో వనవసే||

ఉత్తర ఆర్చికః - ప్రథమ ప్రపాఠకః - ప్రథమోऽర్ధః - సూక్తము 22

వయము త్వామపూర్వ్య స్థూరం న కచ్చిద్భరన్తోऽవస్యవః|
వజ్రిఞ్చిత్రఁ హవామహే||

ఉప త్వా కర్మన్నూతయే స నో యువోగ్రశ్చక్రామ యో ధృషత్|
త్వామిధ్యవితారం వవృమహే సఖాయ ఇన్ద్ర సానసిమ్||

ఉత్తర ఆర్చికః - ప్రథమ ప్రపాఠకః - ప్రథమోऽర్ధః - సూక్తము 23

అధా హీన్ద్ర గిర్వణ ఉప త్వా కామ ఈమహే ససృగ్మహే|
ఉదేవ గ్మన్త ఉదభిః||

వార్ణ త్వా యవ్యాభిర్వర్ధన్తి శూర బ్రహ్మాణి|
వవృధ్వాఁసం చిదద్రివో దివేదివే||

పుఞ్జన్తి హరీ ఇషిరస్య గాథయోరౌ రథ ఉరుయుగే వచోయుజా|
ఇన్ద్రవాహా స్వర్విదా||