శ్రీమద్భాగవత పురాణము - స్కంధము 9 - అధ్యాయము 12
| ←ముందరి అధ్యాయము | శ్రీమద్భాగవత పురాణము (శ్రీమద్భాగవత పురాణము - స్కంధము 9 - అధ్యాయము 12) | తరువాతి అధ్యాయము→ |
శ్రీశుక ఉవాచ
కుశస్య చాతిథిస్తస్మాన్నిషధస్తత్సుతో నభః
పుణ్డరీకోऽథ తత్పుత్రః క్షేమధన్వాభవత్తతః
దేవానీకస్తతోऽనీహః పారియాత్రోऽథ తత్సుతః
తతో బలస్థలస్తస్మాద్వజ్రనాభోऽర్కసమ్భవః
సగణస్తత్సుతస్తస్మాద్విధృతిశ్చాభవత్సుతః
తతో హిరణ్యనాభోऽభూద్యోగాచార్యస్తు జైమినేః
శిష్యః కౌశల్య ఆధ్యాత్మం యాజ్ఞవల్క్యోऽధ్యగాద్యతః
యోగం మహోదయమృషిర్హృదయగ్రన్థిభేదకమ్
పుష్పో హిరణ్యనాభస్య ధ్రువసన్ధిస్తతోऽభవత్
సుదర్శనోऽథాగ్నివర్ణః శీఘ్రస్తస్య మరుః సుతః
సోऽసావాస్తే యోగసిద్ధః కలాపగ్రామమాస్థితః
కలేరన్తే సూర్యవంశం నష్టం భావయితా పునః
తస్మాత్ప్రసుశ్రుతస్తస్య సన్ధిస్తస్యాప్యమర్షణః
మహస్వాంస్తత్సుతస్తస్మాద్విశ్వబాహురజాయత
తతః ప్రసేనజిత్తస్మాత్తక్షకో భవితా పునః
తతో బృహద్బలో యస్తు పిత్రా తే సమరే హతః
ఏతే హీక్ష్వాకుభూపాలా అతీతాః శృణ్వనాగతాన్
బృహద్బలస్య భవితా పుత్రో నామ్నా బృహద్రణః
ఊరుక్రియః సుతస్తస్య వత్సవృద్ధో భవిష్యతి
ప్రతివ్యోమస్తతో భానుర్దివాకో వాహినీపతిః
సహదేవస్తతో వీరో బృహదశ్వోऽథ భానుమాన్
ప్రతీకాశ్వో భానుమతః సుప్రతీకోऽథ తత్సుతః
భవితా మరుదేవోऽథ సునక్షత్రోऽథ పుష్కరః
తస్యాన్తరిక్షస్తత్పుత్రః సుతపాస్తదమిత్రజిత్
బృహద్రాజస్తు తస్యాపి బర్హిస్తస్మాత్కృతఞ్జయః
రణఞ్జయస్తస్య సుతః సఞ్జయో భవితా తతః
తస్మాచ్ఛాక్యోऽథ శుద్ధోదో లాఙ్గలస్తత్సుతః స్మృతః
తతః ప్రసేనజిత్తస్మాత్క్షుద్రకో భవితా తతః
రణకో భవితా తస్మాత్సురథస్తనయస్తతః
సుమిత్రో నామ నిష్ఠాన్త ఏతే బార్హద్బలాన్వయాః
ఇక్ష్వాకూణామయం వంశః సుమిత్రాన్తో భవిష్యతి
యతస్తం ప్రాప్య రాజానం సంస్థాం ప్రాప్స్యతి వై కలౌ
| ←ముందరి అధ్యాయము | శ్రీమద్భాగవత పురాణము | తరువాతి అధ్యాయము→ |