బ్రహ్మపురాణము - అధ్యాయము 148
| ←ముందరి అధ్యాయము | బ్రహ్మపురాణము (బ్రహ్మపురాణము - అధ్యాయము 148) | తరువాతి అధ్యాయము→ |
బ్రహ్మోవాచ
కోటితీర్థమితి ఖ్యాతం గఙ్గాయా దక్షిణే తటే|
యస్యానుస్మరణాదేవ సర్వపాపైః ప్రముచ్యతే||148-1||
యత్ర కోటీశ్వరో దేవః సర్వం కోటిగుణం భవేత్|
కోటిద్వయం తత్ర పూర్ణం తీర్థానాం శుభదాయినామ్||148-2||
తత్ర వ్యుష్టిం ప్రవక్ష్యామి శృణు నారద తన్మనాః|
కణ్వస్య తు సుతో జ్యేష్ఠో బాహ్లీక ఇతి విశ్రుతః||148-3||
కాణ్వశ్చేతి జనైః ఖ్యాతో వేదవేదాఙ్గపారగః|
ఇష్టీః పార్వాయణానీర్యాః సభార్యో వేదపారగః||148-4||
కుర్వన్నాస్తే స గౌతమ్యాస్తీరస్థో లోకపూజితః|
ప్రాతఃకాలే సభార్యో ऽసౌ జుహ్వదగ్నౌ సమాహితః||148-5||
సర్వదాస్తే కదాచిత్తు హవనాయ సముద్యతః|
ఏకాహుతిం స హుత్వా తు సమిద్ధే హవ్యవాహనే||148-6||
ఆహుత్యన్తరదానాయ హవిర్ద్రవ్యం కరే ऽగ్రహీత్|
ఏతస్మిన్నన్తరే వహ్నిరుపశాన్తో ऽభవత్తదా||148-7||
తతశ్చిన్తాపరః కాణ్వః కర్తవ్యం కిం భవేదితి|
అన్తర్విచారయామాస విషాదం పరమం గతః||148-8||
ఆహుత్యోశ్చ ద్వయోర్మధ్య ఉపశాన్తో హుతాశనః|
అగ్న్యన్తరముపాదేయం వైదికం లౌకికం తథా||148-9||
క్వ హోష్యం స్యాద్ద్వితీయం తు ఆహుత్యన్తరమేవ చ|
ఏవం మీమాంసమానే తు దైవీ వాగబ్రవీత్తదా||148-10||
అగ్న్యన్తరం నైవ తే ऽత్ర ఉపాదేయం భవిష్యతి|
యాని తత్ర భవిష్యన్తి శకలాని సమీపతః||148-11||
అర్ధదగ్ధేషు కాష్ఠేషు విప్రరాజ ప్రహూయతామ్|
నేత్యువాచ తదా కాణ్వః సైవ వాగబ్రవీత్పునః||148-12||
అగ్నేః పుత్రో హిరణ్యస్తు పితా పుత్రః స ఏవ తు|
పుత్రే దత్తం ప్రియాయైవ పితుః ప్రీత్యై భవిష్యతి||148-13||
పిత్రే దేయం సుతే దద్యాత్కోటిప్రీతిగుణం భవేత్|
దైవీ వాగబ్రవీదేవం తతః సర్వే మహర్షయః||148-14||
నిశ్చిత్య ధర్మసర్వస్వం తథా చక్రుర్యథోదితమ్|
ఏతజ్జ్ఞాత్వా జగత్యత్ర పుత్రే దత్తం పితుర్భవేత్||148-15||
అపత్యాద్యుపకారేణ పిత్రోః ప్రీతిర్యథా భవేత్|
తథా నాన్యేన కేనాపి జగత్యేతద్ధి విశ్రుతమ్||148-16||
సుప్రసిద్ధం జగత్యేతత్సర్వలోకేషు పూజితమ్|
తస్మిన్దత్తే భవేత్పుణ్యం సర్వం కోటిగుణం సుత||148-17||
మనోగ్లానినివృత్తిశ్చ జాయతే చ మహత్సుఖమ్|
పునరప్యాహ సా వాణీ కాణ్వే ऽస్మింస్తీర్థ ఉత్తమే||148-18||
అభవత్తన్మహత్తీర్థం కాణ్వ పుణ్యప్రభావతః|
లోకత్రయాశ్రయాశేష-తీర్థేభ్యో ऽపి మహాఫలమ్||148-19||
స్నానదానాదికం కించిద్భక్త్యా కుర్వన్సమాహితః|
ఫలం ప్రాప్స్యస్యశేషేణ సర్వం కోటిగుణం మునే||148-20||
యత్కించిత్క్రియతే చాత్ర స్నానదానాదికం నరైః|
సర్వం కోటిగుణం విద్యాత్కోటితీర్థం తతో విదుః||148-21||
యత్రైతద్వృత్తమాగ్నేయం కాణ్వం పౌత్రం హిరణ్యకమ్|
వాణీసంజ్ఞం కోటితీర్థం కోటితీర్థఫలం యతః||148-22||
కోటితీర్థస్య మాహాత్మ్యమత్ర వక్తుం న శక్యతే|
వాచస్పతిప్రభృతిభిరథవాన్యైః సురైరపి||148-23||
యత్రానుష్ఠీయమానం హి సర్వం కర్మ యథా తథా|
గోదావర్యాః ప్రసాదేన సర్వం కోటిగుణం భవేత్||148-24||
కోటితీర్థే ద్విజాగ్ర్యాయ గామేకాం యః ప్రయచ్ఛతి|
తస్య తీర్థస్య మాహాత్మ్యాద్గోకోటిఫలమశ్నుతే||148-25||
తస్మింస్తీర్థే శుచిర్భూత్వా భూమిదానం కరోతి యః|
శ్రద్ధాయుక్తేన మనసా స్యాత్తత్కోటిగుణోత్తరమ్||148-26||
సర్వత్ర గౌతమీతీరే పితౄణాం దానముత్తమమ్|
విశేషతః కోటితీర్థే తదనన్తఫలప్రదమ్|
అత్రైకన్యూనపఞ్చాశత్తీర్థాని మునయో విదుః||148-27||
| ←ముందరి అధ్యాయము | బ్రహ్మపురాణము | తరువాతి అధ్యాయము→ |