బాలకాండము - సర్గము 35
శ్రీమద్వాల్మీకియరామాయణే బాలకాండే పఞ్చత్రింశః సర్గః |౧-౩౫|
| వాల్మీకి రామాయణము | ||||||||||
|---|---|---|---|---|---|---|---|---|---|---|
| ||||||||||
ఉపాస్య రాత్రి శేషం తు శోణా కూలే మహర్షిభిః |
నిశాయాం సుప్రభాతాయాం విశ్వామిత్రో అభ్యభాషత |౧-౩౫-౧|
సుప్రభాతా నిశా రామ పూర్వా సంధ్యా ప్రవర్తతే |
ఉత్తిష్ఠ ఉత్తిష్ఠ భద్రం తే గమనాయ అభిరోచయ |౧-౩౫-౨|
తత్ శ్రుత్వా వచనం తస్య కృత్వా పౌర్వ ఆహ్ణిక క్రియః |
గమనం రోచయామాస వాక్యం చ ఇదం ఉవాచ హ |౧-౩౫-౩|
అయం శోణః శుభ జలో గాధః పులిన మణ్డితః |
కతరేణ పథా బ్రహ్మన్ సంతరిష్యామహే వయం |౧-౩౫-౪|
ఏవం ఉక్తః తు రామేణ విశ్వామిత్రో అబ్రవీత్ ఇదం |
ఏష పంథా మయా ఉద్దిష్టో యేన యాంతి మహర్షయః |౧-౩౫-౫|
ఏవం ఉక్త్వా మహర్షయో విశ్వమిత్రేణ ధీమతా |
పశ్యంతః తే ప్రయాతా వై వనాని వివిధాని చ |౧-౩౫-౬|
తే గత్వా దూరం అధ్వానం గతే అర్ధ దివసే తదా |
జాహ్నవీం సరితాం శ్రేష్ఠాం దదృశుర్ ముని సేవితాం |౧-౩౫-౭|
తాం దృష్ట్వా పుణ్య సలిలాం హంస సారస సేవితాం |
బభూవుర్ మునయః సర్వే ముదితా సహ రాఘవాః |౧-౩౫-౮|
తస్యాః తీరే తతః చక్రుః తే ఆవాస పరిగ్రహం |
తతః స్నాత్వా యథా న్యాయం సంతర్ప్య పితృ దేవతాః |౧-౩౫-౯|
హుత్వా చైవ అగ్నిహోత్రాణి ప్రాశ్య చ అమృతవత్ హవిః |
వివిశుర్ జాహ్నవీ తీరే శుభా ముదిత మానసాః |౧-౩౫-౧౦|
విశ్వామిత్రం మహాత్మానం పరివార్య సమంతతః |
విష్టితాః చ యథా న్యాయం రాఘవో చ యథా అర్హం |
సంప్రహృష్ట మనా రామో విశ్వామిత్రం అథ అబ్రవీత్ |౧-౩౫-౧౧|
భగవన్ శ్రోతుం ఇచ్ఛామి గఙ్గాం త్రి పథ గాం నదీం |
త్రైలోక్యం కథం ఆక్రమ్య గతా నద నదీపతిం |౧-౩౫-౧౨|
చోదితో రామ వాక్యేన విశ్వామిత్రో మహామునిః |
వృద్ధిం జన్మ చ గంగాయా వక్తుం ఏవ ఉపచక్రమే |౧-౩౫-౧౩|
శైలేంద్రో హిమవాన్ రామ ధాతూనాం ఆకరో మహాన్ |
తస్య కన్యా ద్వయం రామ రూపేణ అప్రతిమం భువి |౧-౩౫-౧౪|
యా మేరు దుహితా రామ తయోర్ మాతా సుమధ్యమా |
నామ్నా మేనా మనోజ్ఞా వై పత్నీ హిమవతః ప్రియా |౧-౩౫-౧౫|
తస్యాం గంగ ఇయం అభవత్ జ్యేష్ఠా హిమవతః సుతా |
ఉమా నామ ద్వితీయా అభూత్ కన్యా తస్య ఏవ రాఘవ |౧-౩౫-౧౬|
అథ జ్యేష్ఠాం సురాః సర్వే దేవ కార్య చికీర్షయా |
శైలేంద్రం వరయామాసుః గంగాం త్రి పథ గాం నదీం |౧-౩౫-౧౭|
దదౌ ధర్మేణ హిమవాన్ తనయాం లోక పావనీం |
స్వచ్ఛంద పథ గాం గంగాం త్రైలోక్య హిత కామ్యయా |౧-౩౫-౧౮|
ప్రతిగృహ్య త్రిలోక అర్థం త్రిలోక హిత కాంక్షిణః |
గంగాం ఆదాయ తే అగచ్ఛన్ కృతార్థేన అంతరాత్మనా |౧-౩౫-౧౯|
యా చ అన్యా శైల దుహితా కన్యా ఆసీత్ రఘునందన |
ఉగ్రం సువ్రతం ఆస్థాయ తపః తేపే తపోధనా |౧-౩౫-౨౦|
ఉగ్రేణ తపసా యుక్తాం దదౌ శైలవరః సుతాం |
రుద్రాయ అప్రతిరూపాయ ఉమాం లోక నమస్కృతాం |౧-౩౫-౨౧|
ఏతే తే శైల రాజస్య సుతే లోక నమస్కృతే |
గంగా చ సరితాం శ్రేష్ఠా ఉమాదేవీ చ రాఘవ |౧-౩౫-౨౨|
ఏతత్ తే సర్వం ఆఖ్యాతం యథా త్రి పథ గామినీ |
ఖం గతా ప్రథమం తాత గతిం గతిమతాం వర |౧-౩౫-౨౩|
స ఏషా సుర నదీ రమ్యా శైలేంద్ర తనయా తదా |
సుర లోకం సమారూఢా విపాపా జల వాహినీ |౧-౩౫-౨౪|
ఇతి వాల్మీకి రామాయణే ఆది కావ్యే బాలకాండే పఞ్చత్రింశః సర్గః |౧-౩౫|