బాలకాండము - సర్గము 28
శ్రీమద్వాల్మీకియరామాయణే బాలకాండే అష్టావింశః సర్గః |౧-౨౮|
| వాల్మీకి రామాయణము | ||||||||||
|---|---|---|---|---|---|---|---|---|---|---|
| ||||||||||
ప్రతిగృహ్య తతః అస్త్రాణి ప్రహృష్ట వదనః శుచిః |
గచ్ఛన్ ఏవ చ కాకుత్స్థో విశ్వామిత్రం అథ అబ్రవీత్ |౧-౨౮-౧|
గృహీత అస్త్రో అస్మి భగవన్ దురాధర్షః సురైః అపి |
అస్త్రాణాం తు అహం ఇచ్ఛామి సంహారం మునిపుంగవ |౧-౨౮-౨|
ఏవం బ్రువతి కాకుత్స్థే విశ్వామిత్రో మహా తపాః |
సంహారాన్ వ్యాజహార అథ ధృతిమాన్ సువ్రతః శుచిః |౧-౨౮-౩|
సత్యవంతం సత్య కీర్తిం ధృష్టం రభసం ఏవ చ |
ప్రతిహారతరం నామ పరాఙ్ముఖం అవాఙ్ముఖం |౧-౨౮-౪|
లక్ష్యా అలక్ష్యాః ఇమౌ చైవ దృఢ నాభ సునాభకౌ |
దశాక్ష శతవక్త్రౌ చ దశ శీర్ష శత ఉదరౌ |౧-౨౮-౫|
పద్మనాభ మహానాభౌ దుందునాభ స్వనాభకౌ |
జ్యోతిషం శకునం చైవ నైరాశ్య విమలౌ ఉభౌ |౧-౨౮-౬|
యౌగంధర వినిద్రౌ చ దైత్య ప్రమధనౌ తథా |
శుచి బాహుర్ మహాబాహుర్ నిష్కలి విరుచర్ తథా
సార్చిర్మాలీ ధృతిమాలీ వృత్తిమాన్ రుచిరః తథా |౧-౨౮-౭|
పిత్ర్యః సౌమనసః చైవ విధూత మకరౌ ఉభౌ |
పరవీరం రతిం చైవ ధన ధాన్యౌ చ రాఘవ |౧-౨౮-౮|
కామరూపం కామరుచిం మోహం ఆవరణం తథా |
జృంభకం సర్పనాథం చ పంథాన వరణౌ తథా |౧-౨౮-౯|
కృశాశ్వ తనయాన్ రామ భాస్వరాన్ కామ రూపిణః |
ప్రతీచ్ఛ మమ భద్రం తే పాత్ర భూతోఽసి రాఘవ |౧-౨౮-౧౦|
బాఢం ఇతి ఏవ కాకుత్స్థ ప్రహృష్టేన అంతరాత్మనా |
దివ్య భాస్వర దేహాః చ మూర్తిమంతః సుఖప్రదాః |౧-౨౮-౧౧|
కేచిద్ అంగార సదృశాః కేచిద్ ధూమ ఉపమాః తథా |
చంద్ర అర్క సదృశాః కేచిత్ ప్రహ్వ అంజలి పుటాః తథా |౧-౨౮-౧౨|
రామం ప్రాంజలయో భూత్వా అబ్రువన్ మధుర భాషిణః |
ఇమే స్మ నరశార్దూల శాధి కిం కరవామ తే |౧-౨౮-౧౩|
గమ్యతాం ఇతి తాన్ ఆహ యథా ఇష్టం రఘునందనః |
మానసాః కార్య కాలేషు సాహాయ్యం మే కరిష్యథ |౧-౨౮-౧౪|
అథ తే రామం ఆమంత్ర్య కృత్వా చ అపి ప్రదక్షిణం |
ఏవం అస్తు ఇతి కాకుత్స్థం ఉక్త్వా జగ్ముః యథాఅగతం |౧-౨౮-౧౫|
స చ తాన్ రాఘవో జ్ఞాత్వా విశ్వామిత్రం మహామునిం |
గచ్ఛన్ ఏవ అథ మధురం శ్లక్ష్ణం వచనం అబ్రవీత్ |౧-౨౮-౧౬|
కిం ఏతన్ మేఘ సంకాశం పర్వతస్య అవిదూరతః |
వృక్ష ఖణ్డం ఇతః భాతి పరం కౌతూహలం హి మే |౧-౨౮-౧౭|
దర్శనీయం మృగాకీర్ణం మనోహరం అతీవ చ |
నానా ప్రకారైః శకునైః వల్గుభాషైః అలంకృతం |౧-౨౮-౧౮|
నిఃసృతాః స్మ మునిశ్రేష్ఠ కాంతారాత్ రోమహర్షణాత్ |
అనయా తు అవగచ్ఛామి దేశస్య సుఖవత్తయా |౧-౨౮-౧౯|
సర్వం మే శంస భగవన్ కస్య ఆశ్రమ పదం తు ఇదం |
సంప్రాప్తాః యత్ర తే పాపాః బ్రహ్మఘ్నాః దుష్ట చారిణః |౧-౨౮-౨౦|
తవ యజ్ఞస్య విఘ్నాయ దురాత్మనో మహామునేః |
భగవన్ తస్య కో దేశః సా యత్ర తవ యాజ్ఞికీ |౧-౨౮-౨౧|
రక్షితవ్యా క్రియా బ్రహ్మన్ మయా వధ్యాః చ రాక్షసాః |
ఏతత్ సర్వం మునిశ్రేష్టః శ్రోతుం ఇచ్ఛామి అహం ప్రభో |౧-౨౮-౨౨|
ఇతి వాల్మీకి రామాయణే ఆది కావ్యే బాలకాండే అష్టావింశః సర్గః |౧-౨౮|