ఈ పుట ఆమోదించబడ్డది
వసంతసేన : వారిని నేను సమాధానపరుస్తాగా, నీవు వెళ్ళిరా! ఆలస్యం చెయ్యకు.
మదనిక : ('ఆ స్థితికి వచ్చావుగదా' అని నవ్వుతూ నిష్క్రమణ మారంభించి తిరిగి సంతోషంతో వెనుకకు వచ్చి) అక్కా! అక్కా!! అదుగో, వర్ధమానకుడి చేత చారుదత్తుల వారు బండి పంపించారు. పక్షద్వారం దగ్గర నిలుచున్నది - ఉఁ. బయలుదేరు.
వసంతసేన : అమ్మాయీ! నీవు ఇంటికి పద. నేను కొద్దిసేపట్లో ఈ బండిమీదనే ఇంటికి చేరుతాను.
మదనిక : అక్కా! నీ ప్రణయగ్రంథాన్ని ద్రాక్షాపాకంలోనే నడవనీ -
వసంతసేన : (వెనక్కు తిరిగి, నవ్వి ముక్కుమీద చెయ్యివేసి వారిస్తూ వెళ్ళిపోతుంటే)
మదనిక :
అక్కా! ఓ అక్కా!!
పదవే, పద, పదవే
లోకాన, నీలోన
లేదే కాదారి
ఈ దారే నీ దారి
అక్కా! ఓ అక్కా!!
మనసులలో మాటలలో
తలుపులలో వలపులతో
ఒకటై మీరొకటై
అక్కా! ఓ అక్కా!!
(వసంతసేన ఒకవైపు మదనిక మరొకవైపు నిష్క్రమిస్తారు).
176
వావిలాల సోమయాజులు సాహిత్యం-2
