శా. రాజద్వారము లందు దర్శన సముల్లాసంబునన్ నిల్చుటన్
నా జన్మం బిటు వ్యర్థమైన యది - విన్నాణంబు కోల్పోయి పం
కేజశ్రీపరిణద్ధ మత్కవిత విక్రీడింపగా మానె - నీ
రాజన్యత్వమె నమ్మి చేరితిని శర్వా! రాజరాజేశ్వరా!
ఉ. రాజత శైలరాజ! నగరాజ సుతాసురభూజ!! ఫాలవి
భ్రాజిత నేత్ర దగ్ధరతిరాజ!! సురాసుర నమ్రమౌళి సం
యోజిత నిత్య రమ్య కరయుగ్మ సరోజ!! శిరోజరాజ! ఈ
రాజులు నిన్ను పోలగలరా! సకలార్తిహరా! కృపాకరా!!
ఉ. ఉన్నది నా శరీర మట - ఉన్నది నా యెడ కాళహస్తి సం
పన్న మనోజ్ఞ తాపక శుభప్రతిపాద జలేజ షట్పదం
బన్నటు లెల్లవేళల, నహర్నిశలందును నీవె నాకు నే
నెన్నుట గాదు సర్వము మహేశ! ఎఱుంగుడు వీవె సాక్షిగన్.
శా. నా కీ స్వర్ణముఖీ జలౌఘములలోనన్ నాకకూలంకషా
రాకాచంద్ర విశుద్ధ మోహన సుధారంహమ్ములే తోచు నిం
దేకాలమ్మున దీర్థమాడుటలు స్వామీ! ఏ పురాజన్మలో
నో కావించిన పూజకాక యెటు లై యుండున్ మరొక్కండుగన్.
మ. జననం బన్నది దుఃఖహేతువని నే శర్వా! మహాదేవ!! ము
న్ననినాడన్ మది కెక్కెనా అది మహేశా!! జన్మమే లేని నీ
గణమం దొక్కనిగా నొనర్చు మిక కైలాసరాజ్య న్నట
ద్గణమం దొక్కడనై రచించెదను సంధ్యా నృత్యగీతమ్ములన్. 16
చ. నా కొక జన్మమున్న భువి నన్ జనియింపగ నిమ్ము స్వామి! నీ
వాకిట బిల్వవృక్షమటు వత్సలతన్ - దినమున్ దినమ్ము ప
త్రాకృతితో త్వదీయ 'పదహల్లక' వీథి నలంకరింతు, ఛా
యా కమనీయ దేహమున హ్లాదము గూర్చెద నేత్రపంక్తికిన్.
చ. శిరమున నున్న గంగ శశిశేఖర! నారసనాంచలమ్మునన్
దిరముగ నిల్పుమయ్య మధుదిగ్ధ సువర్ణ మహత్త్వవాణి నీ
కరుణకథానకమ్ములె యుగమ్ములు తెల్గుధరిత్రి పాడగా
చరణములాన చెప్పెద ప్రశస్తికి పాత్రునిగా నొనర్పవే!
శివాలోకనము
63
