ఇంరి యొక్కతె అర్థనారీశ వేష
మూని సాక్షాత్కరించిన మౌని జనులు
భ్రమసి సద్భక్తి జయ జయ పార్వతీశ
యనుచు మ్రొక్కిరి నృపులు నన్గొనుచుననగ
(దశావతార చరిత్ర)
కూచి పూడి వారిలో పురుషులే ఈ అర్థ నారీశ్వరి పగటి వేషాన్ని ధరించే వారు. ఈ పగటి వేషం జానపదుల్ని ఎంతగానో ఆకర్షించి, ఆనందింప జేసింది. ఈ అర్థనారీశ్వరి పగటి వేషాన్ని కూచి పూడి వారు...శంభో శంకర సాంబ సదాశివ, అంచిత కేశ, దిగంబర రూపా అని పాడుతూ, భృంగి వేషంలో ఒకరు, ఆర్థనారీశ్వర వేషంలో ఒకరు, హార్మోనియం, మద్దెల వాయిస్తూ_మరిద్దరు భాగవతులు _ కనీసంగా వస్తారు. అర్థనారీశ్వర వేషానికి, కుడి చెంప శివుడుగానూ, ఎడమ చెంప పార్వతి గానూ ఒక మనిషి రెండు వేషాలు వేసి తల మధ్యనుండి ముక్కు మీద నుండి పాదం వరకూ క్రిందికి ఒక తెర కడతారు. శివుని వేషం వైపు పులి చర్మం, మెడలో పాము, భుజానికి చేతులకు రుద్రాక్ష మాలలు, ముఖాన విభూతి బొట్టు, కంఠానికి నలుపు మచ్చ, మూతిపై ఒకవైపు మీసం జటాజూటంపై గంగను ధరిస్తాడు. అప్పుడప్పుడు జటాజూటంలోని గంగను గొట్టంలో పైకి తన్ని ధారగా పడుతుంటే విచిత్రంగా వుంటుంది.
