పుట:Prabandha-Ratnaavali.pdf/153

సీ. సూర్యునిఁబోలు కౌస్తుభముపైఁ బ్రాలంబ మనియెడు పరివేష మతిశయిల్ల,
మేఘంబుసరియైన మేనిపైఁ బీతాంబ ర ప్రభ యను తటిత్ప్రభలు మెఱయ,
నిండుఁజందురు నవ్వునెమ్మొగంబున సుప్ర సన్నత యను సుధాసార మమర,
జలజంబుఁ దెగడెడు చరణంబునను దివ్య దీర్ఘిక యను పూవుఁదేనె దొరఁగ,
గీ. హస్తముల శంఖచక్రగదాంబుజంబు
లమర ధర్మార్థకామమోక్షముల మాడ్కి
నఖిలలోకేశుఁ డాద్యుఁ డవ్యయుఁడమేయుఁ
డమ్మహాత్ముండు మెఱయు నారాయణుండు. (ఆం) 407

చ. స్ఫురదురుకర్ణతాళమునఁ బుట్టినగాడ్పున విఘ్నవారిదో
త్కరములఁబాఱఁదోలి మదధారల విశ్వముఁ దొప్పదోఁచుచున్
గరివదనుండు దోడుపడుఁగాత! మహాగణనాథుఁ డర్థితోఁ
గరవదన స్తవంబు పని గైకొని సల్పిన నాకు సత్కృపన్ (జ) 408

రంగనాథుఁడు [?] (ఇ)
చ. అదలని తేరు తేరునకు నాదరువై తగువిల్లు వింటికిన్
గుదురగు నారి నారిపయిఁ 2గూన్కుశరంబు శరంబు బొడ్డునం
బొదలినయంత యంతముఖముల్ నిజవాసములైన గుఱ్ఱముల్
చెదరక నీకు నెట్టిపని సేయునయా! గిరిజాధినాయకా! (జ) 409

సీ. ఓజుచే ముట్టక యొగ్గానఁ బట్టక చక్కఁగా దివిఁబాఱు చక్రమునును,
లాయానఁ గట్టక లలి మేఁతవెట్టక వర్ణహీనంబైన వారువములు,
దవనవెట్టక జీవితము కాసుముట్టక సత్త్వసంపదఁజూపు సారథియును,
కడచీలఁ దట్టక ఘనముగా మెట్టక గంభీరసంపద గలుగునిరుసుఁ,
గీ. గలిగి తనరారు నరదంబుఁ గడఁక నెక్కి
త్రిపురవిజయంబుఁ జేకొన్న దేవదేవుఁ
డిందుశేఖరుఁ డానంద మందిరుండు
మనలఁ గరుణావిధేయుఁడై మనుచుఁ గాత! (ఆం) 410

ఉ. గోశతపంచవార్థులును గోయుగవార్ధులు గోత్రివార్ధులున్
గోశరవార్ధులున్ విదితగోశత[వార్ధులు] పంచవార్ధు లా
కేశవ తల్పపద్మభవకేకిసవాహనదానవేశ దే
వేశులకిచ్చునట్టి పరమేశ్వరుఁడీవుత మా కభీష్టముల్. (జ) 411