నురుగు గ్రక్కుచు నూర్చుచు నోరుదెఱచి
యొక్కయడుగైన బెట్టవు దుక్కిటెడ్లు. 43
ఖరకరతాపతప్తమయి కాయము ఘర్మకణాళి నీనుచున్
సొరిగెడి సత్వహీనముగ, చూపులు దీనములయ్యు ప్రొద్దునం
బొరసినమోము తేట లెటువోయెనొ! దప్పియు హెచ్చెనోయి, యి
త్తఱి తరుమూలశాయివయి తాపమువాయుమ చల్లనీడలన్. 44
కరము గష్టించు నిను గాంచి కనికరమున
నెండవేడిమి తొలగించు నిచ్చతోడ
వారిదం బాతపత్రమై వచ్చెగాని,
మారుతాహతి శిథిలమై మరలె నదియు. 45
తరువుల గోటరంబులకు దారెను బక్షికులంబు, బఱ్ఱెలున్
సరసుల జొచ్చెరోజుచు, గనంబడ రెవ్వరు దారులందు, నీ
సరణి నచేతనప్రకృతి చల్లదనంబున కాసచేయ మే
నెరియగ నీవుమాత్ర మిటులేల శ్రమించెద వెఱ్ఱటెండలన్? 46
బాటల వేడిదుమ్ములకు బాదములం జిఱుబొబ్బలెత్త గ్రీ
యూటగ జెమ్మటల్ మొగమునుండిదొరంగగ గూటిదుత్తతో
బాటలగంధి వచ్చెడిని, బాపము! వేగమ నీట మున్గి య
చ్చోటనె మజ్జిగన్నము రుచుల్వచియింపుచు నారగింపుమీ. 47
పుట:Krxshhiivaludu (1924).pdf/33
ఈ పుట ఆమోదించబడ్డది