పుట:2015.391574.BHAKTIRASA-SHATAKA.pdf/451

440

భక్తిరసశతకసంపుటము

చ.⁠

తొలుతను విఘ్ననాయకునిఁ దోరఁపుభక్తిం దలంచి భారతీ లలనకు మ్రొక్కి లక్ష్మికిఁ జెలంగుచు నంజలిఁ జేసి నెమ్మదిన్ గులుకుచు సర్వమంగళను గొల్చి పితామహు నెంచి యారమా కలితు నుతించి నేఁడు శతకం బొనరించెద రాజశేఖరా.

⁠ 13

చ.⁠

వలనుగ రాజతాద్రియు నివాసము హేమనగంబు చాపమున్ గలధనివైన నీకు మరి కాన్క లికేమి యొసంగువాఁడఁ జె న్నలరఁగఁ జంపకోత్పలసుమావళుల న్మధుబిందుబృందముల్ జిలుకఁగఁ గూర్చి నీ కిడెదఁ జేకొను శ్రీకర రాజశేఖరా.

⁠ 14

ఉ.⁠

సారెకు ముద్దుగుల్కెడు లసత్కవితామృదులత్వము న్సుధా ధారలు జిల్కు పల్కుల నుదారపుభక్తియు నాకొసంగ రా రా! రజతాద్రివాస! నగరాజసుతాహృదయేశ సాహితీ సార మెలర్ప నీమహిమ సన్నుతి చేసెద రాజశేఖరా.

⁠ 15

ముక్తపదగ్రస్తచంపకము.⁠

సరసకవీంద్రసన్నుతలసత్పదసారస సారసాంబకా పరిమితబాహువిక్రమనివారణ వారణదైత్యఖండనో త్కర కరలగ్నమేరుగిరికార్ముక కార్ముకసక్తభార్గవీ వర వరబాణ బాణహతపాపపురాసుర రాజశేఖరా.

⁠ 16