శ్రీరస్తు.
సమీరకుమారవిజయము
పీఠిక
లీలం దిలకంబు కస్తురిని జిత్రింపంగ నీ చెక్కుట
ద్దాలం జూచెద నీడ నానఁగఁ దదుద్యత్కాంతికర్పూరరే
ఖాలక్ష్మీం గన వింత యంచు మఱి దక్కం జూడు నాఁ జూచి వీ
క్షాళిన్ నల్వుగ మెచ్చుసీత నగురామాధీశుఁ జింతించెదన్.1
సీ. కులుకుసి గ్గొలుకుచూపులు భర్తమౌళిపై నలరుఁదానికి వ్రాలునళులఁ దెల్ప
మైసౌరభము నాథునాస గంధవహాఖ్య కస్తోకసాఫల్య మావహింపఁ
గనకతాటంకకంకణకాంతి పతినీలమేఘవిగ్రహయుక్తి మెఱుఁగుఁ బోల
నాననైందవమందహాసామృతము చెల్వుచూపుల కనిమిషస్ఫూర్తిఁ జూపఁ
తే. గేలుఁదలిరులతో సౌరసాలశాఖ
కల్పకముమీఁద విరులీను కరణిఁ దరణి
కులునిపై ముత్తియపుఁబ్రాలు వెలయ నించు
సీత లోకైకమాత రక్షించుఁగాత.2
మ. మదనాగోద్ధతి మాన్చి స్వచ్ఛత రహింపన్ పర్వతాగ్రస్థిరా
స్పదలీలన్ విపులాగమైకవనసంచారస్థితిన్ మించి యు
గ్రదశన్ బంచముఖాఖ్య గాంచఁ దగు దుర్గాశైలదుర్గస్తనీ
హృదయాధీశుఁ దలంతు మత్కలుషమత్తేభవచ్ఛిదాకేళికిన్. 3
ఉ. బేడిసడాలు కన్నుగవబెళ్కులఁ జిల్క హుమాయిపల్కులన్
వేడుక చెయ్వులన్ మరునివింతవగల్ గనిపింప శంభునిం
గూడి నిజాంగసంశ్రయతఁ గూర్చి పునర్జనితాంగజోజ్జ్వల
క్రీడ నెఱుంగనీయని గిరిప్రభుకన్య నుపాశ్రయించెదన్. 4
ఉ. సారసగర్భసంజ్ఞను రణస్స్థితుఁడై చతురాస్యుఁ డౌట భా
షారతిఁ జెంది బ్రహ్మతను సత్యగతిం గని యా యాత్మభూత్వబృం
