సర్గ 6
33
క్రుమ్మరించు మేఘమ్ముల మాదిరి,
సెలయే ళ్ళురలి పొరలు కొండలవలె,
రణముఖముల మార్మసలి కసిమసగి
తాండవించు మాతంగ వ్యూహము.
34
బలసాహస కౌశల చిహ్నములుగ
కనక పతకములు గైకొన్న దనుజ
వాహినీ పతులు వందలు వేలును
పొడకట్టిరి కపిపుంగవున కచట.
35
పసిడి జరీదుప్పట్లను కప్పిన
వన్నెల చిన్నెల పల్ల కీలు చూ
పట్టెను హనుమకు, బాలసూర్య మం
డలముల చక్కదనాలు వెలార్చుచు.
36
లేత తీగె లల్లిన పొదరిండ్లును,
చిత్తరువులు రంజిలు చావళ్ళును,
చూడ చక్కనగు క్రీడాగృహములు
మ్రానికలపతో మలచిన నగములు.
37
పాన్పు లమర్చిన పడకటిండ్లు, అభి
రామములయిన విరామసదనములు,
రాక్షసేశ్వరుని రాణివాసమున
కండ్లపండువుగ కాంచె మహాకపి.
38
నెమలి గుంపులకు నృత్తశాల యగు
మందర పర్వత మకుట తలము వలె,
జెండాలాడెడి శిబిరంబులతో
ఇంపగు రావణు గృహము నరసె హరి.
