సర్గ 6
5
ఏనుంగులపయి నెక్కు అమాత్యులు,
కాకలుతీఱిన కదనశూరులును,
అణచరాని మదహయములు కట్టిన
అరదములును నిండారియుండె పురి.
6
వెండితోడను పసిండితోడ గజ
దంతముతో కడు వింతగ చేసిన
రథములు తిరుగును రాజనగరి, శా
ర్దూల సింహముల తోలుగౌసెనల.
7
బహురత్నంబుల భాండారములు, అ
పూర్వభాండము, లమూల్యరత్నకం
బళము, లందలంబు , లరదంబులు, సు
ఖాసనము, లసంఖ్యాతము లొ ప్పెను.
8
బలిసిన పెంపుడు పక్షులు మృగములు
చిన్నెలవన్నెల శృంగారముగా
గుంపులు గుంపులు గునిసియాడు, వా
కిండ్ల నెల్లెడల కండ్లపండువుగ.
9
నియమసుశిక్షితులయిన రక్షకులు
వెలుపలితల కావలికాయగ, ము
ఖ్య - స్త్రీ జనముల కలకలములతో
నిర్భరమై యుండెను నగరంతయు.
10
ముదితారత్నంబులతో, వారల
రత్నాల నగలరవళితో తరం
గించు రావణుని కేళీసౌధము
మ్రోతలతోడి సముద్రము చాడ్పున.