ఈ పుట ఆమోదించబడ్డది
సర్గ 4
5
జంత్ర వాద్యముల సన్నని పాటలు,
నవ్వుటాల సందళ్ళు సరసములు,
రమ్యమయిన నగరంబున నెల్లెడ
వినబడుచుండెను వీనుల విందుగ.
6
మంచి వజ్రముల మాలలు చుట్టిన
తెల్ల యేనుగుల తీరున భాసిలు
భాగ్యభవనముల పంక్తులతో పురి;
శుభ్రపయోధర సుందర దివివలె.
7
రేకులు విప్పారిన పద్మములను
బోలు రూపముల, పాలమబ్బుల సొ
బంగుల, స్వస్తిక మంగళాంకముల,
దీపించును లంకాపుర గృహములు.
8
చిత్రముగ రచించిన మాలలు, నా
భరణములు వెలయ, 'వర్థమాన' మను
పేరులపలకలతో రమణీయము
లయిన గృహములను ప్రియముగ కనె కపి.
9
పలుచందంబుల బహురూపంబుల,
తీరుతీరుగా తీరిచి కట్టిన ,
ఒక భవంతియందుండి దూకి, మఱి
యొక భవనముమీది కెగరసాగెను.
10
అమరలోకమున అప్సరసలవలె,
దానవయువతులు త్రాగిపాడు త్రి
స్థాన స్వరగీతా తరంగములు
వినబడె మారుతి వీనులకింపుగ.
64