సర్గ 1
191
తన్ను మ్రింగ వక్త్రంబును తెఱచిన
సింహికను సమీక్షించి గ్రహించెను,
దాని కాయపరిమాణంబును మ
ర్మస్థానములను మారుతి ధీమతి.
192
అంతలోన అంతంతలుగా తన
వజ్రకాయమును వంచి కుంచి, మఱి
పించి, హరి ప్రవేశించెను సింహిక
తెఱుచియున్న భీకరముఖబిలమున,
193
రాహుముఖ సముద్రములో గ్రహణము
నాడు మునుగు చంద్రముని చందమున
సింహిక నోటను చెనకి దుముకు, కపి
వీరుని చూచిరి చారణసిద్ధులు.
194
హనుమ దాని కుక్షినిబడి, తీక్షణ
నఖములతో అంతర్మర్మాంత్రము
లెల్ల చీల్చి, బయలెక్కె మనోజవ
మున, అది నోటిని మూయకమునుపే.
195
ధృతి దాక్షిణ్య ధురీణములగు వీ
క్షణధారలు రాక్షసిని సింహికను "
హింసించి, హనుమ యెప్పటి యట్టుల
కాయము పెంచ నమేయముగ మఱల.
196
సృజియించెను పరమేష్ఠి సింహికా
మారణకై హనుమంతు నన్నటుల,
ఆతని ఘాతల నగలగ గుండెలు
తూలి సోలిపడె త్రుళ్లి నీళ్ళ నది.
